Fitorja e saj entuziazmon vetëm nacionalistët europianë
I vetmi reagim zyrtar që vjen nga Brukseli për fitoren e Giorgia Melonit në Itali u bë nga zëdhënësi i Komisioni Europian, Eric Mamer, i cili u shpreh se puna me qeverinë e re do të vijojë duke respektuar rezultatet. Megjithatë munguan reagime nga liderët e unionit.
Përgëzime për fitoren e nacionalisteve italianë kanë shprehur vetëm radikalët e djathtë nëpër Europë.
Kryeministri polak Mateus Moraviecki është politikani me postin më të lartë në Europë, që përshëndeti Giorgia Melonin për fitoren. Balazh Orban, drejtori politik në kabinetin e kryeministrit hungarez shkroi në Twitter se Viktor Orban i ka dërguar një letër Melonit për ta uruar atë mbi rezultatin e zgjedhjeve dhe për t’i thënë se po pret me kënaqësi që të bashkëpunojë me të.
Për nacionalisten franceze Marine Le Pen, “populli italian zgjodhi të marrë në dorë fatin e tij duke zgjedhur një qeveri patriotike dhe sovraniste”.
Por çfarë mendimi kanë votuesit italianë për Melonin?
“Nuk e pëlqej shumë atë, por kam simpati për koalicionin ku bën pjesë”, thotë një qytetar.
“Unë nuk e preferoj, por e duan italianët”, shprehet një tjetër.
“Nuk votova për të, por kjo është demokracia”, shton një tjetër.
Ndërsa SHBA-të kanë reaguar për fitoren e Melonit nëpërmjet Sekretarit Amerikan të Shtetit Entoni Blinken i cili me një status në rrjetin social Twitter është shprehur se mezi po pret të nis të punojë me qeverinë e re mbi një sërë çështjesh.
Tv Klan
