Prokuroria e Tiranës ka reaguar zyrtarisht për hetimin që po kryen për kontratat e lobimit të Partisë Demokratike. Reagimi vjen pasi më herët gjatë ditës së sotme u morën në pyetje kreu i PD, Lulzim Basha, Gazment Bardhi, Ilir Dervishi dhe Arben Ristani.
“Duke marrë shkak interesimin e medias për hetimin që po zhvillohet bëjmë me dije se objekt i hetimit është vërtetësia e shpenzimeve monetare të kryera nga subjekti politik PD në fushatën elektorale të vitit 2017
“, thuhet në një deklaratë të shpërndarë për mediat.
“Nga hetimi kanë rezultuar dyshime të arsyeshme të bazuara në prova se ka një diferencë thelbësore mes deklarimeve të bëra zyrtare për shpenzimet e bëra nga subjekti PD dhe shpenzimeve reale që ky subjekt ka bërë. Ky subjekt ka deklaruar vetëm shumën prej 25 000 dollarësh, dhe nuk ka bërë deklarime për shumën prej 650 000 dollarësh
“, thotë organi i akuzës.
Prokuroria thotë më tej se
“sipas akteve të ardhura nga letërporositë e mbërritura nga SHBA-ja dhe Skocia rezultojnë në të qartë pagesat e bëra dhe të padeklaruara, çfarë nënkupton se subjekti PD nuk ka bërë asnjë deklarim për këto pagesa në kundërshtim me ligjin. Marrja në pyetje e shtetasve të mësipërm është një proces normal në rrjedhën e zhvillimit të hetimeve dhe në kohën e çmuar si të përshtatshme në raport me provat e administruara”.
Nga provat e administruara në dosje, organi i akuzës sqaron se rezultojnë të jenë kryer dy pagesa në shumën prej 650 000 dollarësh për efekt lobimi në SHBA, të cilat nuk janë deklaruar ligjërisht nga subjekti PD. Njëra nga këto pagesa rezulton të jetë bërë nga një shoqëri e huaj dhe konkretisht Biniatta Trade.
Prokuroria e Rrethit Gjyqësor Tiranë në reagimin e saj thotë se
“garanton hetim objektiv dhe të paanshëm në lidhje me këtë çështje, duke u bazuar në prova dhe në ligj, si dhe të pandikuar nga deklaratat”
.
/tvklan.al
