DASH: Do të diskutohet për ndalimin e dinarit
I dërguari amerikan për Ballkanin Perëndimor, Gabriel Escobar, këtë javë do ta vizitojë Kosovën. Ai pritet që me krerët e institucioneve të diskutojë për për dialogun me Serbinë, si dhe për dinarin serb në Kosovë, ka bërë të ditur nëpërmjet një njoftimi Departamenti Amerikan i Shtetit.
Ai pritet që në Prishtinë të arrit të mërkurën ndërsa paraprakisht do të qëndrojë në Bruksel ku do të takohet edhe me emisarin e BE-së për dialogun Miroslav Lajçak.
Përveç liderëve institucional, ai në Kosovë do të takohet edhe me shoqërinë civile dhe komunitetin serb.
“Ai do të mbajë takime edhe në lidhje me ndikimin e rregullores së re të Bankës Qendrore të Kosovës për pagesat me para të gatshme dhe për të bërë thirrje për ndërmarrjen e hapave për plotësimin e nevojave të qytetarëve të Kosovës pa pengesa”, njofton Departamenti Amerikan i Shtetit.
Escobari e viziton Kosovën në një kohë kur marrëdhëniet e qeverisë dhe zyrtarëve amerikanë duken të tensionuara për shkak të dinarit serb, të cilin Banka Qëndrore e Kosovës e ndaloi përmes një rregulloreje muajin e kaluar.
Muajin e kaluar, Escobari tha se Qeveria e Kosovës nuk po e trajton SHBA-në si partnere. Ndërkohë për rregulloren e BQK-së, që parasheh vetëm Euron valutë e që ka hyrë në fuqi nga 1 Shkurti, është diskutuar në Brusel ndërmjet kryenenegociatorit serb dhe përfaqësuesve të BQK-së nga pala kosovare. Pas takimit, Lajçak tha se shumë pyetje politike mbetën pa përgjigje. Ai për këtë çështje javën e kaluar vizitoi Kosovën.
Tv Klan
