Kryetari i Iniciativës Qytetare, SDP, Olivier Ivanoviç është vrarë sot në Mitrovicën Veriore. Ai dyshohet se është gjuajtur nga një veturë në lëvizje afër zyrave të partisë.
Oliver Ivanoviç u lind në Pejë më 1 prill 1953. Ai u bë kadet në Akademinë Ushtarake të Zagrebit nga ku u kthye në Kosovë dhe u diplomua në Fakultetin e Inxhinierisë Mekanike në Mitrovicë.
Para luftës ishte president i Klubit të Karatesë “Trepça” në Mitrovicë ndërsa aktivitetin politik e nisi, në vitin 1999, me një kërkesë nga “Rojat e Urës”, të cilët e ftuan Ivanoviçin për t’i trajnuar si mjeshtër i karatesë.
Në 1999 u bë anëtar i Këshillit Kombëtar Serb, SNV, e më vonë president i bordit ekzekutiv.
U shkarkua pas dy viteve kur u bënte thirrje serbëve të Kosovës të merrnin pjesë në zgjedhjet në Kosovë.
Në vitin 2001, ai nisi krijimin e Trupit Koordinues, organizata zyrtare e qeverisë serbe ndërsa atë vit u zgjodh deputet i Kuvendit të Kosovës nga 2001- 2004 nga koalicioni “Kthimi”.
Oliver Ivanoviç ishte lider i Partisë “Liri, Demokraci, Drejtësi”.
Në vitin 2008 Ivanoviç u bë Sekretar i shtetit në Ministrinë Serbe për Kosovën ndërsa në vitin 2013 kandidoi për kryetar të komunës së Mitrovicës së Veriut.
Ivanoviç u arrestua në vitin 2014 për krime lufte në vitin 1999 dhe 2000 në Mitrovicë si i akuzuar për vrasje, dëmtim prone dhe dëbim të shqiptarëve nga veriu i Mitrovicës
Sa ishte në paraburgim, ai hyri në grevë urie në kërkim të mbrojtjes në liri. Dëshmitarët thanë së gjatë luftës e kanë parë me uniformë dhe të armatosur.
Ivanoviç u dënua për krime lufte të kryera në vitin 1999 me 9 vjet burg ndërsa më vonë rasti ndaj tij është kthyer në rigjykim./KlanKosova
