Komisioni i Disiplinës së Federatës Shqiptare të Futbollit ka dënuar klubin e Partizanit të mërkurën me zhvillimin e dy ndeshjeve pa spektatorë në fushën përkatëse.
“
KF “Partizani”, për sjellje të gabuar të spektatorëve duke hedhur sendeve të forta brenda rrethimit të fushës se lojës dhe për paraqitje të parullave fyese dhe raciste, në bazë të nenit 66/3/a të KDS, dënohet me zhvillimin e 2(dy) ndeshjeve pa spektatorë në fushën përkatëse
”, tha FSHF në faqen e saj zyrtare.
Një ditë më parë Federata Shqiptare e Futbollit shprehu shqetësimin e thellë dhe u distancua në mënyrë të prerë nga incidenti i së hënës ndodhur gjatë ndeshjes Partizani-Skënderbeu, duke iu referuar parullës së shpalosur në fillim të ndeshjes në seksionin e tifozërisë së Partizanit, parullë që sipas FSHF, ishte dukshëm me sfond racist dhe me mesazhe të papranueshme për fushën e blertë dhe lojën e futbollit./tvklan.al
