Pfizer dhe Moderna aplikojnë në BE për vaksinat

EMA: Përgjigja, në fund të Dhjetorit

Firmat farmaceutike Moderna dhe Pfizer-BioNTech janë përfshirë në një garë intensive për të siguruar përdorimin e vaksinave të tyre. Të dyja kompanitë farmaceutike aplikuan të martën pranë Agjencisë Europiane të Barnave, EMA, për aprovimin për përdorim urgjent të produkteve të tyre, që renditen mes vaksinave me efektshmërinë më të lartë të zhvilluara deri tani, 95%. 

Pavarësisht se këto firma kanë bërë të ditur se kanë kapacitetin për të kryer shpërndarjen e dozave në një kohë rekord, agjencia europiane me qendër në Amsterdam pritet ta japë aprovimin jo më herët se fundi i këtij muaji.

Agjencia Evropiane e Barnave, EMA, tha të martën se ekspertët e saj kanë marrë të dhëna të mjaftueshme nga kompanitë farmaceutike Pfizer dhe Moderna në lidhje me vaksinat e tyre Covid-19 dhe agjencia do të përfundojë të dy proceset e vlerësimit të tyre deri në 29 Dhjetor për produktin e Pfizer dhe 12 Janar për atë të firmës Moderna.

Komisioni Evropian ka të ngjarë të japë autorizimin përfundimtar për shpërndarjen e vaksinave Covid-19 vetëm në muajin Janar, menjëherë pasi rregullatori i barnave në BE të miratojë përdorimin e vaksinave. Reuters raportoi se një zëdhënës i BE-së konfirmoi se autorizimi për përdorimin e këtyre vaksinave mund të jepet vetëm pak ditë pas vendimit të EMA-s.

Sipas rregullave të BE, EMA rekomandon autorizimin e një ilaçi ose vaksine dhe Komisioni i BE i autorizon ato në bazë të këshillave shkencore të EMA, pas konsultimit me 27 shtetet e BE.

Tv Klan