Programi “Historia ime”, në Tv Klan solli ditën e sotme historinë e vështirë të 44-vjeçares që jeton në Bulqizë. Drita është nënë e 4 fëmijëve dhe rrëfeu se kur ishte vetëm 17 vjeç, nëna e saj e martoi me mblesëri.
Ata ishin 9 fëmijë, babai i tyre kishte ndërruar jetë dhe nëna e kishte të pamundur t’i rriste të gjithë me vetëm një rrogë.
Ajo ishte në gjimnaz, kur mamaja e saj jep fjalën për ta martuar me një person në të njëjtën moshë me të.
Gazetarja: Sa vjeç je?
Drita: 44!
Gazetarja: Je bërë nënë në moshë të re?
Drita: 21 vjeç!
Gazetarja: Si ka qenë historia e njohjes me babain e fëmijëve të tu?
Drita: Unë jam martuar në vitin 1994, atëherë më dha nëna ime me shkuesi, jo me dashuri.
Gazetarja: Sa vjeç ishe kur u martove?
Drita: 17 vjeç!
Gazetarja: Nuk e kundërshtove nënën tënde që ishe e vogël?
Drita: Jo, sepse ne ishim jetima, ishim pa babë, edhe nënën e kishim të vjetër dhe ajo donte t’i martonte fëmijët, që kur të vdiste mos na linte pa rehatuar. Ishte mentaliteti i atyre atëherë.
Gazetarja: Nëna jote sa fëmijë kishte?
Drita: 9 fëmijë kemi qenë. Kalova një fëmijëri shumë të vështirë. Pavarësisht se mua nëna ime më çoi në shkollë, kam qenë në gjimnaz kur më ka martuar.
Gazetarja: E le gjimnazin për t’u martuar?
Drita: Po e lashë shkollën!
Gazetarja: Pse ishte kaq e vështirë fëmijëria jote?
Drita: Ishte sepse nuk kemi patur me thënë të drejtën, kemi vuajtur dhe vetëm më një rrogë, 9 kalamaj nuk i mbante dot nëna ime. Erdhën më kërkuan, nëna ime i dha llafin menjëherë, po mbas 3 ditësh kam ardhur nuse këtu në Bulqizë.
Gazetarja: Si shkoi? Si ishin fillimet tuaja?
Drita: 4 vitet e para kam shkuar shumë mirë. Ai ishte pa shkuar ushtar kur e kam marrë, e kam pritur kur ka ardhur prej ushtrie, aty filluan debatet, se kur ishte ushtar filloi rakinë.
Gazetarja: Sa vjeç ishte ai, kur ti ishe 17 vjeç?
Drita: Ne moshatar të dy kemi qenë, të dy me një moshë!/tvklan.al
