Basha: Liderët evropianë mbështetje të pakushtëzuar për Shqipërinë

Basha: Liderët evropianë mbështetje të pakushtëzuar për Shqipërinë

20:51 21/11/2019

Kryetari i Partisë Demokrati shprehet se liderët më të rëndësishëm evropianë i kanë konfirmuar se do të jenë në mbështetje të pakursyer për Shqipërinë.

Gjatë Kongresit të Partisë Popullore Europiane të mbajtur në Zagreb, Lulzim Basha është takuar me disa nga zyrtarët e lartë të BE-së, mes të cilëve kancelaren Angela Merkel si dhe me Presidenten e re të KË, Ursula Von De Leyen.

Në një komunikim të bërë në Fcaebook, Basha shkruan “kjo përkrahje është konfirmuar edhe përmes një rezolute të veçantë të miratuar në PPE, ku krahas mbështetjes për hapjen sa me parë të negociatave, përcaktohen qartë dhe detyrat që duhet të përmbushë Shqipëria, duke nisur nga zgjidhja e krizës politike”.

“Jam i lumtur të ndaj me ju se Shqipëria dhe shqiptarët kanë mbështetjen e fortë të drejtuesve kryesorë të BE-së dhe kryetarëve të shteteve dhe qeverive të vendeve anëtare. Kjo më është komunikuar në të gjitha takimet që zhvillova gjatë Kongresit të Partisë Popullore Europiane, duke nisur nga Presidentja e re e Komisionit Europian, Ursula Von De Leyen, Kancelarja Gjermane, Angela Merkel, Kancelari i Austrisë, Sebastian Kurtz, Kryeministri i Greqisë, Kyriakos Mitsotakis, Kryeministri i Irlandës Leo Varadkar, si dhe nga drejtuesit e politikës së jashtme ne Parlamentin Europian dhe parlamentet e vendeve anëtare”, shprehet kreu i PD-së.

Basha deklaron se Partia Popullore Europiane “nxit partinë në pushtet dhe opozitën në Shqipëri të ndërmarrin të gjitha përpjekjet për të tejkaluar menjëherë këtë krizë të thellë politike përmes dialogut dhe miratimin konsensual nga partitë politike, të një reforme elektorale në përputhje me rekomandimet e OSBE-ODIHR që shtron rrugën drejt zgjedhjeve të lira dhe të ndershme”.

Sipas Bashës, PPE thekson se blerja e votave dhe përfshirja e krimit të organizuar në zgjedhje është e papranueshme për standartet europiane, ndërsa thotë se bën thirrje për rezultate të prekshme dhe në kohë të hetimit të suksesshëm të përgjegjësve, përfshirë dhe politikanët, zyrtarët e shtetit.

“PPE shpreh nevojën urgjente që Shqipëria të sigurojë funksionimin e duhur të Gjykatës Kushtetutese dhe Gjykatës së Lartë duke i plotësuar vendet e tyre me gjyqtarë dhe pret një vendim të shpejtë dhe final nga Gjykata Kushtetuese mbi legjitimitetin e zgjedhjeve vendore të 30 qershorit 2019. PPE shpreh shqetësim të thellë për fenomenin e vazhdueshëm të personave me rekorde kriminale që kandidohen për poste në institucione apo emërohen si funksionarë publikë në shkelje të hapur të “Ligjit të Dekriminalizimit” dhe bën thirrje për zbatim pa ekuivoke të ligjit, dhe largimin nga detyra të zyrtarëve që e kanë shkelur atë”, deklaroi Basha.

“PPE demonstron mbështetjen e qartë  për integrimin europian të Shqipërisë dhe bën thirrje për zgjidhjen e krizës së rëndë politike e cila sa vjen e po thellohet me shumë. Plotësimi i kushteve, jo në letër por në realitet, janë e vetmja rrugë që do të afrojë Shqipërinë me BE.  Zgjedhjet e lira dhe të ndershme janë e vetmja zgjidhje, për krizën që ka mbërthyer vendin”, përfundon postimi i kreut të selisë blu, të bërë në Facebook. /Tvklan.al


Grupi
LAJMET
Të ngjashme
Grupi