Basha videomesazh për qytetarët: Në Ditën e Pavarësisë, nga zemra e kombit kullon gjak

Basha videomesazh për qytetarët: Në Ditën e Pavarësisë, nga zemra e kombit kullon gjak

09:17 28/11/2019

Kryetari i Partisë Demokratike Lulzim Basha, në një videomesazh dërguar qytetarëve, thotë se në këtë Ditë të Pavarësisë, nga zemra e kombit tonë kullon gjak.

Kryedemokrati shprehet se këto 3 ditë kanë qenë nga më të vështirat për popullin shqiptar gjatë viteve të fundit.

Për shkak të situatës së rëndë me të cilën po përballet vendi ynë, Lulzim Basha ka anuluar ceremonitë për 107-vjetorin e Pavarësisë së Shqipërisë.

Mesazhi i kryetarit të PD-së Lulzim Basha:

Të dashur bashkëqytetarët e mi!

Mëngjesin e të martës, ndërkohë që shqiptarët përgatiteshin për të përkujtuar 107 vjetorin e Pavarësisë, një tërmet i tmerrshëm goditi vendin tonë.

Ende nuk e dimë përmasën e plotë të dëmeve. Ajo që dimë deri tani është se me dhjetëra shqiptarë kanë humbur tragjikisht jetën nën rrënoja, qindra janë lënduar dhe shtëpitë e tyre janë shkatërruar.

Mendimet dhe lutjet tona janë me të lënduarit, me ata që vuajnë dhe me familjet që përjetuan dhimbjen më të madhe, atë të humbjes së njerëzve të tyre të shtrenjtë. Në Ditën e Pavarësisë, nga zemra e kombit tonë kullon gjak.

Kjo që përjetuam ditët e fundit është një kujtesë për të gjithë ne, se sa e brishtë është jeta e njeriut. Se sa mirënjohës duhet të jemi për gjithçka që na ka falur Zoti, dhe për t’i përqafuar pak më fort fëmijët dhe të dashurit tanë.

Gjatë këtyre tre ditëve, kemi përjetuar disa prej orëve më të vështira të viteve të fundit, por po kështu kemi parë më të mirën e njerëzve tanë. Njerëzit e parë që u sulën mbi rrënoja për të kërkuar të mbijetuarit, pa menduar dy herë për rrezikun që u kanosej; Mjekët dhe infermierët që punojnë pa orar për të mjekuar të lënduarit; Mijëra të tjerë që nuk janë kursyer për të ofruar ndihmë dhe kontribute për vëllezërit dhe motrat tona në nevojë.

Megjithë ndasitë tona, në orë nevoje ne jemi një komb i bashkuar, lidhur ngushtë nga të njëjtat vlera dhe nga e njëjta dhembshuri. Kjo është Shqipëria e vërtetë! Shqipëria e njerëzve me zemër të madhe dhe me forcë të pashtershme.

Sot, në vend të festës së Pavarësisë, një komb i lënduar është kërrusur nga dhimbja për humbjen e jetëve. Le ta nderojmë kujtimin e atyre që na mori kjo tragjedi duke qëndruar të bashkuar, të fortë dhe me dashuri për njëri-tjetrin. Dhe qoftë kujtimi i tyre uratë për të gjithë ata që i njohën! Zoti ju bekoftë ju dhe familjet tuaja dhe Zoti e bekoftë Shqipërinë!

/tvklan.al



Grupi
LAJMET
Të ngjashme

Grupi