Kryeministri Edi Rama gjatë fjalës së tij në mbledhjen e ditës së sotme me ministrat dhe grupin e Partisë Socialiste në Kryesinë e Kuvendit tha se me procesin e dixhitalizimit të prokurimeve publike asnjë ministër nuk do të ketë lidhje me tenderat.
Rama u ndal edhe tek shoqëra publike e operatorit të Blerjeve të Përqendruara ku sipas kreut të qeverisë, kjo shoqëri e re do të asistohet nga shoqëri partnere evropiane. Ndër të tjera ai bëri të ditur se po krijohet një katalog dixhital për blerjet e vogla për institucionet.
Edi Rama: Ne kemi hedhur një hap tjetër përpara. E ka hedhur kjo shumicë me propozim të qeverisë për të krijuar shoqërinë publike të operatorit të Blerjeve të Përqendruara, e cila ka filluar zyrtarisht punë me 25 Prill, dhe do t’i kryejë ajo të gjitha prokurimet e ministrive dhe institucionet e tyre të varësisë. E thënë troç, asnjë ministër dhe asnjë strukturë e varësisë s’do të ketë asnjë lidhje me tendera, por do të merret vetëm me politikat sektoriale.
Kjo shoqëri është ndërtuar sipas modeleve më të mira evropiane do të asistohet nga shoqëri partnere evropiane, do të ofrojë shërbimet e veta për të gjitha njësitë e pushtetit vendor apo njësitë e tjera jashtë varësisë së pushtetit ekzekutiv, të cilat ne nuk i detyrojmë dot me ligj që të heqin dorë nga organizimi i tenderave. Po ashtu operatori i blerjeve të përqendruara po ndërton një katalog dixhital të blerjeve të vogla për të gjitha institucionet publike, që të mos bëjnë tendera për çdo dërrasë të zezë, karrige zyre apo tavolinë, por të blejnë direkt nga katalogu i quajtur arkzonë, një lloj amazoni i mallrave për të gjithë shërbimet mbështetëse të institucioneve të shtetit, duke kursyer kohë dhe para dhe mbi të gjithë duke i mbyllur derën korrupsioni.
/tvklan.al
