#EDielaShqiptare nga #ArditGjebrea prej vitit 2008 në #TvKlan, programi më popullor në të gjitha familjet shqiptare çdo të dielë. Një program i cili përfshin një fashë orari maratonë, prej 6 orësh transmetim.
“Udha e Shkronjave – Dorina vs Arben
“Udha e Shkronjave” mirëpret sot dy konkurentë të rinj, të cilët do të sfidojnë njëri tjetrin në garën e gërmave. Dorina Zajaku nga Tirana përballet me mësuesin e anglishtes nga Fieri, Arben Mustaj.
“Kujdes shëndetin” – Kirurgjia e estetikës gjenitale, Liv Hospital
Ka një mesazh për ty – Një vlerësim i munguar
“Më mungoi vitin e fundit”, Arjelda merr më në fund vlerësimin e munguar
Çdo fund viti, nxënësit e dalluar nderohen me një çmim të veçantë që njeh arritjet e tyre akademike. Një gabim bëri që Arjelda të mos e merrte dot këtë vlerësim të rëndësishëm për të. Megjithatë, surprizat më të mëdha ndodhin vetëm në “Ka Një Mesazh Për Ty”. Dikush ka organizuar gjithçka që certifikata e vlerësimit të mbërrijë në studion e së “Dielës Shqiptare” në Tv Klan.
Arjelda: Është një dhuratë që e bëjnë gjithmonë, çdo fund viti për nxënësit e dalluar dhe këtë vitin e fundit ishte kjo që më mungoi.
Ardit Gjebrea: Po pse?
Arjelda: Nuk e di, ndodhi një gabim dhe unë shkova atje në eventin që u bë dhe pastaj nuk mora dhuratën.
Ardit Gjebrea: U mërzite?
Arjelda: Shumë. Tani po qesh, por atë ditë u bëra vërtet shumë keq.
Ardit Gjebrea: Pse?
Arjelda: Ishte një zhgënjim shumë i madh për mua se është diçka që punoj tërë vitin, jo vetëm për këtë, por thjesht si motivim dhe të shkoja atje dhe të mos merrja dhuratën që kisha pritur për kaq kohë… vërtet lëndoi shumë.
Ardit Gjebrea: Ti çfarë bëre më pas?
Arjelda: Më pas, normalisht qava me orë të tëra dhe ishte babi pastaj ai që filloi të kërkonte më tepër, çfarë kishte ndodhur dhe…
Ardit Gjebrea: Po pse nuk e kërkove ti vetë, ti je e rritur.
Arjelda: Epo babi im është pak… si ta them, pak natyrë protektive dhe kërkon gjithmonë që të jetë aty për mua.
Ardit Gjebrea: Po kur mos ta kesh babin nesër?
Arjelda: Jo do ta kem. Nuk dua ta mendoj.
Ardit Gjebrea: Mendoje, do kesh princin.
Arjelda: Jo, jo babi do jetë gjithmonë.
Ardit Gjebrea: Epo ty të lumtë goja! Ti nuk e ke idenë sa krenar duhet të ndihet babi yt nëse është duke i dëgjuar këto fjalë tani.
“Tani fillon jeta e vërtetë”, Arjelda mëson nga e papritura
Fëmijët janë krenaria më e madhe e prindërve dhe rasti i Edmondit na e kujton më së miri këtë. Ai ka ardhur në “Ka Një Mesazh Për Ty” për vajzën e tij, Arjeldën e cila është 17 vjeçe. Arjelda është nxënëse e shkëlqyer, por për shkak të një gabimi nuk arriti që këtë vit të merrte certifikatën e vlerësimit.
Ajo u mërzit tej mase dhe Edmondi bëri çmos që të zgjidhte situatën në mënyrë që vajza e tij të merrte çfarë i takon. Por përveç certifikatës që e priste Arjeldën në studion e së “Dielës Shqiptare” në Tv Klan, ishte edhe një mesazh nga i ati për t’i dhënë një mësim të madh për jetën.
Edmond: Ti je krenaria ime, por jo vetëm krenaria ime, e të gjithë njerëzve që të njohin ty. Ti je një vajzë e mrekullueshme…
Ardit Gjebrea: Që më ke ngjarë mua, do thotë babi në këtë rast.
Edmond: Babi sot ty të ka thirrur këtu për të vetmen arsye që të të jap një mesazh, ty dhe gjithë fëmijëve të tjerë, motrës dhe vëllait tënd. Jeta ka të papritura. Siç të ndodhi, mund të ndodhë diçka më e madhe, mund të bëhet padrejtësi në çdo vend por ti nuk duhet të strukesh në padrejtësinë tënde, por duhet të ringrihesh, të ecësh më tutje, të luftosh për atë që ti ëndërron, por ti duhet të jesh më e fortë, më e guximshme sepse tani fillon jeta e vërtetë prandaj mos u struk, ti dhe të gjithë fëmijët.
Ka një mesazh për ty – Aida lë Francën për nënën
E mposhti vetminë vrasëse me gjestin fisnik, Aida: Për 10 vite, nëna u kujdes për vajzat e jetimores
Aida, e cila ndan sot historinë e saj me “Ka Një Mesazh Për Ty” nga “E Diela Shqiptare”në Tv Klan jeton në Francë që prej vitit 1991. Asokohe kishte vetëm 3 muaj që ishte martuar dhe bashkëshorti i saj shkoi i pari, ndërsa Aida qëndroi me nënën e cila i kërkonte të qëndronte. Pak javë pas ikjes së bashkëshortit, Aida mësoi se ishte shtatzënë. Ajo arriti të shkonte në Francë, solli në jetë edhe një djalë në vitin 1994, por xhelozia e tepërt e bashkëshortit i dha fund martesës.
Megjithatë, shqetësimi kryesor i Aidës mbetej nëna e saj. Ajo kishte emigruar me vajzat në Greqi, por vendosi të kthehej në atdhe. Vetmia ishte vrasëse për të, por arriti të gjente një zgjidhje.
Aida: Mami pas një viti e gjysmë, dy vjet më mbrapa ikën në Greqi, jetuan atje, motrat i kam akoma atje. Mami ndenji nja 10 vjet. Motra e vogël bëri dy çuna edhe ajo, i rriti ato dy çuna dhe pastaj tha “vendi im është aty ku më bëri koka bam, po kthehem”.
Ardit Gjebrea: Dhe mami u kthye.
Aida: U kthye, vetëm. Aty ishte shumë e vështirë, shumë e vështirë, vetmia, filloi ta vriste vetmia shumë.
Ardit Gjebrea: Gjeti një rrugëzgjidhje më duket.
Aida: Po. Ishte para Vitit të Ri, po shihte televizor, pa jetimoren, që tregonin që njerëzit shkonin të merrnin fëmijë për Vit të Ri dhe tha “ja, e gjeta. S’kam fëmijë, mbesa e nipër këtu, do kem më tepër”. Edhe shkoi, foli me drejtoreshën, i tha “a ka mundësi, dua të marr nja 3-4 vajza?” Drejtoresha u habit, i tha “3-4?! Pse, çfarë ka? Po jo, njerëzit në përgjithësi marrin nga një”. Kur shkoi për të marrë 3-4 fëmijë, me një vajzë drejtoresha kishte probleme, donte të dilte dhe mami e mori më vete duke i folur, “mos ki merak”, i tha, “javës tjetër do të të marr vetëm ty”. Edhe u qetësua dhe në atë kohë drejtoresha i tha “ua, faleminderit shumë”, “s’ka asgjë, s’bëra gjë”, tha. Kur shkoi të shtunën tjetër dhe me gjithë mend, e mbajti premtimin, e mori dhe pastaj i tha drejtoreshës “a ka mundësi të vij një orë në ditë a si e keni ju që të merrem me vajzat, t’u mësoj si të gatuajnë, si të qepin se do rriten një ditë, do bëhen gra, do bëhen nëna” dhe drejtoresha përnjëherë pranoi, i tha “ua ç’është kjo ide shumë e bukur, me gjithë qejf, me gjithë zemër” dhe pastaj çdo të shtunë mami shkonte merrte 8 vajza, i mbante për drekë, kalonin pasditen, shëtisnin, çdo të shtunë. Për 10 vjet më duket e bëri këtë. U mësonte për të ardhmen, u thoshte “ do bëheni nëna një ditë, mendoni”.
Jeton prej 33 vjetësh në Francë, Aida përgatitet të lërë gjithçka për njeriun më të shtrenjtë
Jeta e Aidës është ndërtuar në Francë që prej vitit 1991. Atje është bërë nënë, ka arritur t’ia dalë mbanë e vetme edhe pas divorcit, të rrisë fëmijët, është rimartuar dhe është bërë gjyshe. Por në këtë panoramë të jetës së saj mbetet vetëm një shqetësim i përhershëm: nëna.
Aida rrëfeu në “Ka Një Mesazh Për Ty” se vetë ajo dhe motrat janë në emigrim, ndërsa nëna nuk pranon të jetojë larg atdheut. Ajo qëndron e vetme dhe Aida ka menduar një zgjidhje që rrallëherë e kemi dëgjuar në rubrikën e së “Dielës Shqiptare” në Tv Klan.
Aida: Mamit do t’i them që… ngaqë e shoh që vetmia e vret shumë…
Ardit Gjebrea: Do ta marrësh në Francë?
Aida: Nuk vjen, mirë ishte por nuk vjen. Edhe vendosa po të gjej një punë këtu, për aq kohë sa do jetojë, do vij.
Ardit Gjebrea: Pra do vish ti në Shqipëri?
Aida: Po.
Ardit Gjebrea: Ke vendosur të jetosh ti në Shqipëri derisa të marrë frymë mami.
Aida: Po.
Ardit Gjebrea: Po burri?
Aida: Do shkojë, do vijë.
Ardit Gjebrea: Po merre edhe burrin këtu, Shqipëria e bukur është.
Aida: Po por gjithsesi asaj s’i dihet, edhe mundet, edhe mund të vijë se ai s’punon më.
“Heroina ime!”, Aida shpërthen në lot kur sheh imazhin e nënës: Ka dhënë gjakun e trupit për ne
Menjëherë pas transmetimit të dërgimit të ftesës së “Ka Një Mesazh Për Ty” për nënën e saj, Aida përlotet. Ajo na njohu me historinë e saj të emigrimit, të nënës së mbetur vetëm dhe të dëshirës së madhe që e ka sjellë në rubrikën e së “Dielës Shqiptare” në Tv Klan. Nuk është vetëm largësia ajo që e motivon Aidën të lërë Francën për t’i ndenjur pranë nënës, por edhe sakrificat që ajo ka bërë për t’i rritur pa bashkëshortin në krah.
Aida: Heroina ime. Nuk tregova shumë aspekte por… ka dhënë gjakun e trupit për të na rritur.
Ardit Gjebrea: Vërtet?
Aida: Në moshën 17 vjeçe fillova punë, aty ia grisa kartën, kishte një kartë që jepnin gjak. Është boll. Kisha dëshirë të vazhdoja shkollën. Ëndrra ime ishte të isha aktore, por e lashë gjimnazin dhe fillova punë. Ia grisa kartën, i thashë stop. Mamaja ime është ndarë me babin tim kur isha 10 vjeçe. Isha 10 vjeçe. Motrën e madhe e kisha 15, të voglën 5. Pa… domethënë që të them me veten time unë jam tani, por sikur më lindi vetë, vetë vinte natyrisht, gjëmoja prapa motrën e madhe mos ta ngacmonin çunat, motrën e vogël, mora vendin e babait dhe prandaj u detyrova pastaj të ndaloj shkollën, gjimnazin, thashë të filloj punë.
Rriti e vetme 3 vajza, Aleksandra: Nuk i thosha as nënës nëse flinin pa bukë, këpucët ua sajoja vetë
Aleksandra e ka pranuar ftesën për të qenë pjesë e “Ka Një Mesazh Për Ty”. Shtangia e saj më e madhe ishte momenti kur zbuloi se pas ekranit në studion e së “Dielës Shqiptare” në Tv Klan, qëndronte vajza, Aida për të cilën mendonte se ishte rikthyer në Francë.
Vetmia e ka lodhur Aleksandrën, por nga ana tjetër ajo tregon se edhe në këtë formë, ia ka dalë të rrisë tre vajza, pa ndihmën e askujt.
Aida: Ke qenë shoqja, mikja, si i thonë…besimtarja ime që ia thoja të gjitha se goca të reja, kur jemi të reja dalim me shoqe. Sa vija sikur rrëfehesha, i dije të gjitha.
Aleksandra: I kam trajtuar si shoqe, pastaj nënë, pastaj babë. Kështu ishte fati, isha nënë dhe babë për to. I falenderoj shumë dhe u jam shumë mirënjohëse se s’më kanë kundërshtuar një herë, normale për të mirë që u flisja. Por ato ishin të reja, donin plazhin, donin të dilnin, unë s’i lejoja. Vinte vajza e madhe me të shoqin, unë s’i lejoja këto të dyja, kur të fejohen të shkojnë me të zotët e punës. Tani, ngaqë jeta më vrau thosha që t’i kisha sa më të rregullta, sa më të mira. Por asnjëherë qortim, vetëm shoqe dhe mendoja po sillem shoqe që çfarëdo t’u ndodhë në shoqëri, të vijë të ma tregojë.
Ardit Gjebrea: Epo sot ka ardhur se të ka gjetur një shok në Francë.
Aleksandra: Uuu, Ardit nga ajo anë më kanë lodhur, edhe në Greqi kur isha e ma punonin, shkonim pinim kafe të më prezantonin…Ardit, e kam stakuar trurin që 35 vjeçe. Mbaroi ai muhabet! Kur s’të ngroh dielli i themi ne andej në mëngjes, s’më ngrohu edhe i drekës, Ardit në darkë perëndon dielli, nuk të ngroh.
Publiku: Bravo!
Ardit Gjebrea: “Bravo” thonë zonjat.
Aleksandra: Bravo, tamam. Vajzat m’u rritën…
Ardit Gjebrea: Jo, me këtë “bravo” u trishtova se kuptova që paska edhe këtej që nuk i ngroh dielli.
Aleksandra: Dëgjo Ardit, përgjithësisht ne gratë shqiptare duhet ta pranojmë këtë sidomos brezi im njëherë po e po, por që më pëlqen. Se çfarë bën tjetri, nuk më intereson, unë jam unë dhe mua më pëlqen ky ritëm i jetës time.
Ardit Gjebrea: Vetmia të mërzit?
Aleksandra: Më mërzit se kam edhe shumë diagnoza se Ardit, mua më ka lodhur shumë jeta se kam qenë një natyrë që nuk doja që edhe mamaja të dinte nëse unë i vija fëmijët pa bukë. Ngrihesha herët, shkoja te kazanët, mblidhja gomat që i merrja në punë e i pastroja që u bëja sandale e këpucë. Vetë, në shtëpi. Kështu që ajo lodhje tani do dalë, normale plus edhe mosha se s’jam e vogël, jam goxha.
Aida nuk do t’i kërkojë nënës të vijë me të në Francë sepse ajo është e vendosur për mos t’u larguar nga Shqipëria, edhe pse jeton krejt e vetme. Ajo dëshiron që për pjesën e mbetur të jetës së nënës së saj të kthehet në Shqipëri për t’i qëndruar pranë, një kërkesë që pranohet me shumë dëshirë nga Aleksandra.
“Shihemi në Gjyq” – Blerës vs trashëgimtarë, kush ka të drejtë?
“Mua më ka ikur tepeleku, kësaj fiqiri”, seanca fillon me sulme: Më ke kërcënuar e provokuar!
Seanca e ndërmjetësimit nga “Shihemi në Gjyq” ka nisur me një përplasje mes Eduartit dhe Dorinës. Nga ajo që mësuam nga insertet, është se Eduarti i ka marrë Dorinës një hua borxh. Dorina kërkon të marrë çfarë i përket dhe është e gatshme të gjejë një zgjidhje paqësore.
Ndërmjetësja e rubrikës së “E Diela Shqiptare” në Tv Klan, Eni Çobani i jep fjalën Eduartit që nxisin reagimet e Dorinës.
Eduart: Mua më ka ikur tepeleku, kësaj avash avash i ikën fiqiri.
Dorina: Mos më fol mua me atë gjuhë ti!
Eduart: Vjen më kërcënon mua zonja Eni.
Dorina: Për çfarë të kam kërcënuar?
Eduart: Më kërcënon mua dhe mos e zgjat më të lutem.
Dorina: Ore qëndro aty!
Eduart: Ti duhet ta kesh për nder që vjen këtu, e kupton?
Dorina: Të lutem ulu atje ku je, mos na nxirr nga korniza e etikës. Do të krijosh skenën, do këndosh?
Eduart: Do bisedosh me zonjën Eni.
Dorina: Po ulu more atje.
Eduart: Të isha nga ata unë të çoja në polici ty!
Dorina: Kush je ti për të më çuar mua në polici?
Eduart: Ti më ke provokuar
Dorina: Për çfarë të kam provokuar?
Eduart: Qepe gojën!
Dorina: Mos më thuaj mua qepe gojën se s’je në moshën time që të të kundërvihem, të lutem. Shko atje njëherë, shko. E shijove skenën.
Eduart: Ti s’ke punë në pronën time!
Dorina: Prona është e imja, është e imja se ke pranuar lekët!
Eduart: Rri në atë tënden, ato që t’i kam do t’i jap.
Dorina: Kur do mi japësh? Kur?
Eduart: Po deshe rri, qepe gojën!
“Lekët ia kam kërkuar me respekt”, Gjebrea-Dorinës: Me respekt, duhet të presësh
Dorina ka 4 vjet që pret Eduartin t’i shesë banesën e tij. Bëhet fjalë për një hapësirë rreth 30 metra katrorë me vlerë 25 milionë lekë. Për shkak të sëmundjes së bashkëshortes, Eduarti i mori fillimisht 10 milionë Dorinës dhe ranë dakord që pjesa tjetër e pagesës të bëhej pas marrjes së pronës.
Por sot ata kanë ardhur në “Shihemi në Gjyq” sepse banesa nuk ka kaluar te Dorina. Bashkëshortja e Eduartit ndërroi jetë në vitin 2021 dhe duke qenë se çifti nuk ka fëmijë, gjysma e saj ndahet mes të afërmve. Kjo sjell konfliktin mes tyre në studion e së “Dielës Shqiptare” në Tv Klan sepse Eduarti nuk ka bërë procedurat e nevojshme që të përfundojë shitja e banesës.
Dorina: 4 vite rri lexon gazetë qetësisht ky dhe vjen tek unë, “më duhen edhe ca lekë”, ore ke bërë ndonjë letër ti se kemi ngelur kështu? Ti që po vjen e kërkon dhe unë s’kam marrë asgjë. “Po s’ka problem”.
Eduart: Fjala vjen se tani…
Dorina: Ti do t’i marrësh sigurisht, por pasi të marr unë dokumentin tim, patjetër.
Ardit Gjebrea: Më shiko pak, ti kur ke nevojë i kërkon para asaj apo jo?
Eduart: Ia kam kërkuar, me respekt se dhe ajo e di muhabetin.
Ardit Gjebrea: Edhe ajo me respekt t’i ka dhënë, ti ia ke kërkuar me respekt dhe ajo t’i ka dhënë me respekt.
Dorina: Po ai respekti im a do vijë ndonjë ditë te unë tani? 10 milionë lekë, a do vijë respekti mbrapsht?
Ardit Gjebrea: Ti ia ke kërkuar me respekt dhe ajo t’i ka dhënë me respekt.
Eduart: Edhe unë… unë nuk është se ia mohova.
Eni Çobani: Po mirë nuk ia mohove, por i ke dhënë gjë?
Eduart: Kjo do binanë, nuk do lekët, do binanë.
Dorina: Po për çfarë t’i dhashë ato lekë unë?
Ardit Gjebrea: Ti 15 milionë lekët e vjetra do ia japësh binanë?
Eduart: Kur të më japë mua edhe 15 milionë kjo, do i jap binanë.
Ardit Gjebrea: Po në atë bina janë edhe kunatat e tua.
Eduart: Në atë… po le të presë kjo zonja.
Ardit Gjebrea: Dorina, me respekt duhet të presësh.
Dorina: Po ça respekti…
“Do lekë ti?”, Eduarti ‘zgjidh’ konfliktin me Dorinën: Më gjej një grua me prona…
Pjesa e dytë e “Shihemi në Gjyq” ka nisur me një situatë gazmore. Pavarësisht situatës konfliktuale, Eduarti nuk i kursen disa deklarata që shkaktojnë të qeshura. Ai i thotë Dorinës se do t’i marrë paratë nëse ajo i gjen atij një grua të pasur.
Eduart: Çlodhu pak çlodhu!
Ardit Gjebrea: Pse të çlodhet?
Eduart: Të çlodhet pak se u lodh. I ka ikur fiqiri asaj.
Dorina: Ta tregoj fiqirin unë ty!
Eduart: I ka ikur fiqiri, mua më ka ikur tepeleku me kohë! Kësaj po i ikën fiqiri!
Ardit Gjebrea: Po nuk është se është miliardere ajo.
Eduart: Po çfarë jam unë? Milioner?
Ardit Gjebrea: Po edhe ti…
Eduart: Edhe unë s’jam milioner. Nga kjo, pak e pak e u bënë ato.
Dorina: Pak e pak e mbushe ti, u bënë kështu ato.
Eduart: Edhe unë s’ia mohoj asaj. Bëhet muhabeti këtu, jepja dhe atyre…
Ardit Gjebrea: E si si është këjo puna? Unë do të ta jap nusen, por është pak shtatzënë.
Eduart: Dëgjo mirë, se ma çove në mendje. Nëse nuk bëhet ky muhabet…
Dorina: Do bëhet se erdhe këtu ti!
Eduart: Zonjë, do lekë ti? Do borxhin?
Dorina: Po hajde merri ti nesër te puna.
Eduart: Ta jap unë borxhin, më gjej një grua me prona, shes ato pronat e asaj unë dhe të t’i jap ty.
Dorina ka 4 vjet që pret Eduartin t’i shesë banesën e tij me çmimin 25 milionë lekë. Eduarti i mori fillimisht 10 milionë sepse i nevojiteshin për sëmundjen e bashkëshortes. Pasi ajo ndërroi jetë, gjysma e pjesës së saj të banesës u ka kaluar familjarëve. Kjo mban peng Dorinën dhe Eduartin që nuk ka arritur të zgjidhë situatën
“Do ta ngalasësh?”, Gjebrea pajton Eduartin dhe Dorinën në mënyrën më të bukur
Eduarti dhe Dorina arritën ta gjejnë gjuhën e përbashkët përmes ndërmjetësimit në “Shihemi në Gjyq”. Ai ra dakord që të ndjekë procedurat e nevojshme duke filluar me rinovimin e certifikatës së pronësisë dhe më pas, të përpiqet të bindë familjarët e bashkëshortes së ndjerë që të bien dakord që pjesa e saj e banesës me sipërfaqe 30 metra katrorë, t’i mbetet atij.
Kjo do të sillte përfundimin e shitjes së banesës te Dorina, e cila i ka dhënë Eduartit 10 milionë lekë nga 25 që kanë rënë dakord. Gjatë rrëfimit për marrëdhënien e tij me bashkëshorten e ndjerë, ai thotë se “as një ngalasje nuk mban mend”. Kjo fjalë dialektore ‘ngacmon’ moderatorin e së “Dielës Shqiptare” në Tv Klan, Ardit Gjebrean që ‘vulos’ pajtimin e palëve.
Ardit Gjebrea: Më pëlqeu ajo fjala “ngalasje”.
Eni Çobani: Gjirokastrit pra.
Ardit Gjebrea: Se e kam dëgjuar nga gjyshja ime. Do ta ngalasësh Dorinën?
Eduart: Jo tamam, t’i jap dorën.
Eni Çobani: Po patjetër.
Eduarti i jep dorën dhe përqafon Dorinën.
Ardit Gjebrea: E ngalasi Dorinën!
“Të Panjohurit” – Diana Kodra
