#EDielaShqiptare nga #ArditGjebrea prej vitit 2008 në #TvKlan, programi më popullor në të gjitha familjet shqiptare çdo të dielë. Një program i cili përfshin një fashë orari maratonë, prej 6 orësh transmetim.

“Udha e Shkronjave” – Valbona vs Arben

“Kujdes Shëndetin”-  Problemet dentare – Thomais Ioannou, Edward Lee

“Ka një mesazh për ty” – E panjohura që dha çelesat e shtëpisë

Vëllai i pësoi hemorragji cerebrale, e panjohura i hapi derën: Më dha çelësat e shtëpisë që ditën e parë!

Mirësia vjen atëherë kur nuk e pret dhe në forma që as nuk ta merr mendja. Historia e Aurorës,  e cila ka ardhur në “Ka Një Mesazh Për Ty” e tregon më së miri këtë. Ajo jeton prej vitesh në Athinë ku është shpërngulur edhe vëllai i saj.

Në vitin 2021, ky i fundit vendos të kthehet në Shqipëri por të nesërmen Aurora dhe familjarët mësojnë një lajm të frikshëm. Vëllai, asokohe 47 vjeç kishte pësuar një hemorragji cerebrale dhe kishte rënë në koma. Ai ndodhej në Tiranë në Spitalin e Traumës dhe të gjithë gjenin mënyra që të koordinoheshin me njëri-tjetrin për të ndenjur pranë.

Kur erdhi radha e saj, tregon Aurora për rubrikën e së “Dielës Shqiptare” në Tv Klan, ajo nuk kishte shtëpi në Tiranë që të mundte edhe të gatuante për vëllain. Punëmarrësja e saj në Athinë i kishte folur se veç saj, me të punonte edhe një shqiptare tjetër, Mira, e cila ndodhej në Tiranë. Mira do të ishte personi që do ta priste Aurorën në Tiranë dhe do t’i ofronte ndihmë të pakushtëzuar në  momentin e vështirë ku ajo gjendej.

Aurora: Sa kam arritur në Shqipëri, në Tiranë, këtu në spital, ka ardhur direkt zonja më ka takuar atje në spital.

Ardit Gjebrea: Mira?

Aurora: Mira.

Ardit Gjebrea: Erdhi direkt në spital.

Aurora: Po.

Ardit Gjebrea: Pa gjendjen e vëllait.

Aurora: E pa edhe gjendjen e vëllait si ishte.

Ardit Gjebrea: Të pa edhe ty.

Aurora: Më pa, u takuam njëra me tjetrën. “Ti në shtëpinë time do të jesh si në shtëpinë tënde”, tha. më dha çelësat që ditën e parë kur e takova.

Ardit Gjebrea: Pra të dha çelësat e shtëpisë ku jetonte ajo apo të një shtëpie tjetër?

Aurora: Jo, aty ku jetonte ajo. Ajo jetonte me gocën dhe thotë për të gatuar, për të larë,për të shpëlarë, të gjitha do t’i kesh gati këtu.

Ardit Gjebrea: Një muaj zgjati e gjithë historia.

Aurora: Një muaj zgjati sa ndenja unë aty, përditë, çdo mëngjes e bënte ajo. Ngrihej në mëngjes, ngrihej e para, më bënte kafenë, më bënte mëngjesin që “të shkosh në spital’ thoshte, “të jesh vajzë e fortë”. Merrja mëngjesin t’ia çoja vëllait, shkoja merrja drekën, merrja rrobat, i ngrija.

Ardit Gjebrea: Më fal, ajo gatuante edhe për vëllain tënd?

Aurora: Po.

Ardit Gjebrea: Gatuante për ty edhe për vëllain, shkoje e merrje drekën e bënte gati Mira dhe ti ia çoje vëllait?

Aurora: Po, po. Thashë do marr një dhomë afër spitalit dhe i thashë do iki nga ti. Ajo s’më linte, më donte mua dhe thoshte “nuk do ikësh deri kur të mbarojë”.

Ardit Gjebrea: Derisa të dalë vëllai nga spitali. Ka ardhur ndonjëherë në spital, e ka parë vëllain?

Aurora: Përditë vinte.

Rastësia që bëri bashkë dy heroina: Të jam mirënjohëse gjithë jetën!

Aurora dhe Mira janë njohur nga një rastësi e çuditshme dhe e vështirë prej së cilës kanë krijuar një miqësi të palëkundur. Në vitin 2021, Aurora u detyrua të kthehej në Shqipëri për t’iu gjendur pranë vëllait të saj që kishte pësuar një problem të rëndë shëndetësor.

Vajzat nuk njiheshin nga afër, por punëmarrësja e tyre në Athinë i ndërlidhi me njëra-tjetrën. Mira e priti Aurorën në Tiranë dhe i dha çelësat e shtëpisë që ditën e parë, edhe pse nuk e dinte se kush ishte. Ajo iu gjend pranë në gjithçka për një muaj të tërë, pa ia lëshuar asnjëherë dorën.

Aurora ka ardhur në “Ka Një Mesazh Për Ty” vetëm për ta falenderuar përzemërsisht. Mes lotësh, të dy gratë japin një mesazh të bukur mirësie në rubrikën e së “Dielës Shqiptare”në Tv Klan.

Aurora: Të jam mirënjohëse për gjithçka që ke bërë për mua. Ti e di shumë mirë pjesën që kemi kaluar me vëllain. Të falenderoj jashtëzakonisht. Ti në familjen time je si motër, si nënë, si gjithçka, edhe te motrat dhe vëllezërit e mi.

Mira: Ti e ke bërë, ti i ke thënë falenderimet e tua, ti edhe vëllai jot.

Aurora: Të jam mirënjohëse gjithë jetën, shumë faleminderit për gjithçka që ke bërë për mua dhe familjen time. Të uroj të gjitha të mirat, të kesh shëndet e jetë sa më të gjatë me Stelën. Të dua  shumë!

Mira: Është një motër e përkryer. Unë bëj me të vërtetë për njerëzit, por kjo heroinë çfarë ka bërë për atë vëlla…la familjen.

Ardit Gjebrea: Shiko, që motra do bëjë për vëllain është normale, por që një njeri nuk njeh fare dikë tjetër dhe të bëjë  kaq shumë për të,heroina në këtë rast mendoj që je ti.Mira: Ardit, ne jemi shqiptarë. Zonja që unë kam punuar që unë siç ju thashë, flas akoma që kam gjithë këto vite që jam kthyer në Shqipëri, kam akoma miqësi, Aurora punonte atje, fëmijët që unë i  prita nga materniteti, Aurora po i rriste për në shkollë. Kur ajo ma thotë dhe unë ditën tjetër i them Aurorën e kam në shtëpi, më thotë mua “çfarë thua, si në shtëpi, pse nuk e çove në hotel?” I thashë dëgjo se edhe atë unë e kam rritur se është shumë e vogël, e kam njohur 23 vjeçe kur unë shkova në punë tek ajo. I thashë dëgjo, ne jemi shqiptarë. Ne nuk i lëmë dot njerëzit te dera me valixhe e aq më tepër që ma ke sjellë ti, por edhe ti mos të ma sillje, si mund ta çoj një gocë të vetme, ajo është vetëm, si mund ta çoj në hotel, si t’i them kur unë kam gjithë këtë shtëpi të madhe, nuk më shqetëson. Jo, do ta mbaj këtu. “Bravo”, tha, “do e mbash aty?” Po, po i thashë, as nuk e vë në diskutim se nuk ka në burrë për krahu, është vetëm, ku do të shkojë, ku do të vijë? Dhe kur i them Aurorës, më thotë “unë do të rri këtu? Me të vërtetë do më mbash?” Çfarë thua i thashë, ne jemi vetëm, tre goca, do kalojmë bukur dhe me të vërtetë kaluam bukur derisa vëllai u bë mirë shyqyr Zotit dhe iku me këmbët e veta në Athinë.

“Ka nje mesazh per ty” – Luna mesazh babait Dëfrim Methasani

“Flokët e para pas kimioterapisë”, rikthimi i Luna Methasanit pas sëmundjes!

Historinë e Lunës, vajzës së madhe të gazetarit sportiv Dëfrim Methasani e njohim tashmë të gjithë. Lajmi se ajo po luftonte me sëmundjen e kancerit ishte prekës për këdo, por Luna ia doli që të triumfonte. Gëzimi sot është i shumëfishtë pasi Luna është rikthyer edhe më e fortë, me një buzëqeshje rrëzëllitëse në studion e së “Dielës Shqiptare” në Tv Klan.

Mes duartrokitjeve, ajo bën me dije për “Ka Një Mesazh Për Ty” se gëzon shëndet të plotë dhe kimioterapia u ka lënë vendin flokëve të parë të rinj.

Luna Methasani: Qenka shumë bukur dhe shumë emocion të jesh këtu përballë teje dhe publikut të  mrekullueshëm!

Ardit Gjebrea: Njëherë lavdi Zotit je mirë!

Luna Methasani: Po, falë Zotit! Edhe mjekëve natyrisht, duarartë. Ka disa muaj që i jam rikthyer jetës normale, gëzoj shëndet të plotë, analizat e para kanë dalë mirë dhe këto janë flokët e para pas kimioterapisë.

Ardit Gjebrea: T’i gëzosh! “Shumë e bukur”, thotë publiku, je shumë e bukur!

Luna Methasani ndan ngjarje të parrëfyera të jetës së të atit: Nga paragjykimet për prejardhjen te punët larg profesionit si gazetar

Luna Methasani është vajza që tashmë e njohim si një luftëtare të pamposhtur. Vajza e gazetarit Dëfrim Methasani arriti të fitonte mbi kancerin, një lajm i gëzuar për të gjithë. Por Luna nuk ka ardhur për vete në “Ka Një Mesazh Për Ty”.

Motivi i saj është i ati ndaj të cilit ka ndier gjithnjë përgjegjësinë që duke qenë vajza e madhe, të trashëgonte diçka prej tij, në këtë rast pasionin për sportin. Kur Luna ishte vetëm 3-muajshe, prindërit u transferuan nga Peshkopia në Tiranë dhe jetesa nuk ishte aq e lehtë.

Nga historitë që ajo ka dëgjuar dhe i ndan për herë të parë me rubrikën e së “Dielës Shqiptare” në Tv Klan, ardhja në Tiranë e përballi Dëfrim Methasanin me paragjykime për prejardhjen, me kushte të vështira ekonomike dhe marrjen e punëve të tjera që s’lidheshin me profesionin e tij vetëm e vetëm për t’i siguruar familjes gjithçka që i duhej.

Luna Methasani: Im atë kur ka nisur fillimet e tij në Radio Televizionin Shqiptar, shpeshherë edhe është bullizuar, është quajtur si “malok”, “erdhi ky maloku nga veriu të na zërë vendin këtu”. Madje më ka treguar që kronikat e para i ka shkruar në trotuarin përballë Radio Televizionit Shqiptar sepse nuk e mendonin, jo për aftësinë e tij profesionale, por vetëm për faktin që vinte nga veriu, nuk e mendonin të denjë mjaftueshëm për të qenë aty dhe për të konkurruar me emra të njohur të televizionit.

Ardit Gjebrea: E di si është puna? Unë mendoj që aftësitë e dikujt duken që në momentin e parë për ata që kuptojnë kështu që babi yt duke qenë një super gazetar, nuk do të duhej kohë dhe kështu që të gjithë ata që kishin probleme le të themi me prejardhjen e tij, kam përshtypjen që problemet ishin në mendësinë e tyre sepse babi ne e dimë se kush është babi yt.

Luna Methasani: Po, falë punës së tij të jashtëzakonshme në fakt i ka bërë vendin vetes kudo dhe ai është shumë modest, Ardit.

Ardit Gjebrea: Ku keni banuar ju kur erdhët në Tiranë?

Luna Methasani: Në fakt nuk jemi transferuar direkt në Tiranë, por në një fshat të Tiranës, në Pezë ku për kushtet ekonomike që ishin atëherë dhe për faktin që prindërit bashkë me gjyshërit, por edhe hallën me xhaxhain të cilët nuk ishin martuar në atë kohë, transferohen aty për shkak të kushteve ekonomike. Ishte shumë e vështirë dhe babi detyrohej ta bënte rrugën nga Peza për në Radio Televizionin Shqiptar me biçikletë.

Ardit Gjebrea: Çdo ditë?

Luna Methasani: Çdo ditë. Ajo që më dhemb më shumë për babin është fakti që është detyruar të punojë 2-3 punë të ndryshme. Pra krahas emrit shumë të madh që mund të bëjë si një gazetar, pavarësisht se në fillimet e tij do të ruajë atë figurën e tij të gazetarit, ai nuk ka ngurruar asnjëherë të bëjë edhe punë të thjeshtë. Ka punuar edhe roje natën, ka punuar edhe kameraman nëpër dasma vetëm për të mundësuar të gjitha kushtet ekonomike për familjen.

“Nuk ishte e shkruar të kishim vëlla”, Luna rrëfen historinë e dhimbshme: Të dyja herët që kishte djalë, mami e humbi beben

Dëfrim Methasani, gazetari i njohur sportiv është baba i 3 vajzave: Lunës, Blertës dhe Rinës. Vajza e tij e madhe, Luna, historinë e së cilës e njohim, ka ardhur në “Ka Një Mesazh Për Ty” për të folur jo rreth vetes, por për të atin.

Pas vështirësive të fillimit në profesionin e tij që Luna i rrëfeu për herë të parë në rubrikën e së “Dielës Shqiptare” në Tv Klan, ajo kaloi edhe në aspektin familjar. Shumë shpesh vajzat kanë dëgjuar njerëzit të shprehin keqardhje që Dëfrimi nuk ka një djalë dhe mendonin se duhej patjetër të kishin një vëlla.

Prindërit vendosin që ta provojnë dhe shtatzënia e shumëpritur ndodh, por njëkohësisht edhe dy fatkeqësi njëra pas tjetrës. Motra e gazetarit ndërron jetë në moshën 29-vjeçare nga kanceri dhe një muaj më pas, edhe fëmija shuhet në barkun e nënës.

Luna Methasani:Tentuan sërish prindërit, në vitin ’99 për të bërë një djalë. Kësaj here goditën në shenjë por kur mami ishte 4-5 muajshe shtatzënë, fëmija nuk jeton më që në barkun e nënës dhe një muaj para se të ndodhte aborti, babi humbi motrën e tij në moshën 29-vjeçare nga kanceri. Ishte një humbje e jashtëzakonshme për të gjithë familjen, për gjyshërit, për të gjithë ata që e njohën, aq më tepër një vajzë në lule të moshës vetëm 3 muaj e martuar. Por Ardit, Zoti me një dorë të hedh dhe me tjetrën të pret. Në vitin 2000, pikërisht pas një viti, mami ngel sërish shtatzënë por këtë herë me vajzë. Motrën e tretë e donim, e donin aq shumë saqë preferuan që t’i linin emrin e hallës që nuk jetonte më.

Ardit Gjebrea: Vërtet?

Luna Methasani: Po, që ajo të ishte një kujtim  i gjallë në mesin tonë. Kështu e thërrisnim Rina dhe sot e kësaj dite Rina jeton shumë mirë dhe do të martohet në qershor.

Për shkak të shpërnguljes kur Luna ishte e vogël dhe përkushtimit ndaj familjes, nëna e saj nuk i kishte kryer studimet e larta. Afër moshës 40-vjeçare, Ajo vijon studimet dhe diplomohet si infermiere, profesion që e ushtron ende në një poliklinikë në Tiranë. Ndërkohë vajzat kishin ende shpresa që të bëheshin me vëlla, ndaj Dëfrimi dhe bashkëshortja tentojnë sërish, por tragjedia përsëritet.

Luna Methasani: Ne nuk i shuajtëm kurrë shpresat që mund të kishim një vëlla dhe kështu prindërit… iu mbush mendja edhe nga farefisi që “ti Dëfrim je ende i ri, mund të kesh një djalë, mund të kesh një trashëgimtar mbi të gjitha”. Provuan, qëlluan në shenjë, sërish djalë, ka qenë një gëzim i jashtëzakonshëm, nuk e di, duhet të prisnim 3 muaj që të konfirmonim gjininë fillimisht por fiks një muaj pasi ne e morëm lajmin që ishte djalë, pa asnjë shenjë, pa asnjë simptomë, mjeku pritet në fytyrë kur shikon bebin në eko dhe thotë që “fatkeqësisht, rrahjet e zemrës së tij kanë ndaluar”. Nuk ishte e shkruar që të kishim një vëlla por sigurisht që babi, absolutisht, pavarësisht mendimeve apo lutjeve të farefisit apo çfarëdolloj gjëje që mund t’i thoshin njerëzit, e thoshte gjithmonë këtë shprehje: “Jo se nuk e kam dashur një djalë, por me vajzat që kam nuk e kam ndier kurrë mungesën e tij”.

Lufta me kancerin në moshën 29-vjeçare, momenti i vështirë i Luna Methasanit: U fshija lotët prindërve

Historia e humbjes së hallës në moshën 29-vjeçare nga kanceri dhe më pas vetë sëmundja e saj vitin e shkuar, i ka mësuar Luna Methasanit rëndësinë esenciale të shëndetit. Vajza e madhe e gazetarit Dëfrim Methasani u përball gjatë vitit të shkuar me kancerin, një luftë që tashmë e ka fituar.

Gjatë rrëfimit të saj për “Ka Një Mesazh Për Ty” nga “E Diela Shqiptare” në Tv Klan, Luna e kujton mirë momentin e vështirë të diagnostikimit. Mjekët ia bënë me dije fare thatë se gjendja ishte kritike, por për të ishte edhe më e vështirë që t’u jepte kurajë prindërve.

Luna Methasani: Siç e përmenda, prindërit dhe gjyshërit e kanë humbur një vajzë në moshën 29 vjeçe e unë isha pikërisht 29 kur u diagnostikova. Kur kam pyetur mjekun, më ka thënë që “nuk është gjenetike dhe pak rëndësi ka nëse është gjenetike apo jo, ky ishte fati yt”.

Ardit Gjebrea: Ta treguan mjekët?

Luna Methasani: Po, ma treguan dhe isha përballë mjekut, në dhomë me të, me të dy prindërit dhe ma tha direkt në fytyrë: “Më vjen shumë keq, por ti je diagnostikuar me kancer. Duhet urgjent të fillojmë kimioterapinë, por para kësaj duhet të bëjmë një operacion”. Më shumë sesa vetja Ardit, më beso, më dhimbseshin prindërit e mi, më dhimbseshin gjyshërit dhe unë nuk kisha kurrsesi zgjidhje tjetër përveçse të vazhdoja të isha shumë e fortë sepse pse jo, mund t’ia dilja dhe siç e shihni jam këtu, ia dola.

Luna shton se kjo sëmundje lidhet fort me anën psikologjike të njeriut. Mjekët nuk garantojnë kurrë për shanset e mbijetesës, pasi forca psikologjike dhe vendosmëria luajnë një rol thelbësor në luftën ndaj saj.

Luna Methasani: Njeriu bëhet i fortë.

Ardit Gjebrea: Ku e gjen?

Luna Methasani: Brenda vetes. Ndala për një çast dhe mendova “çfarë zgjidhjeje kam unë tani?” Në momentin që na tha mjeku, mamaja ime lëvizi nga dhoma e mjekut duke qarë. M’u dhimbs në shpirt. Babi nuk mund të fliste nga lotët, nuk mund të reagonte, po qante me ngashërim. Besoj që momenti më i vështirë ai kur u kam fshirë lotët dhe u kam dhënë kurajë kur unë sapo e kisha marrë vesh, nuk kishte kaluar as një minutë nga momenti që unë e kisha marrë vesh që isha sëmurë dhe u thashë “ju mos u mërzisni, keni lindur një luftëtare të fortë dhe unë do t’ia dal. Ka plot raste që ia kanë dalë”. Prandaj doja që të jepja një mesazh force për të gjithë ata që ndoshta përballen apo larg qoftë mund të jenë në një situatë të tillë, ka gjithmonë dritë në fund të tunelit, ka gjithmonë shpresë sepse njeriu është shumë i fortë.

Ardit Gjebrea: Dua të vij të të përqafoj!

Gjebrea niset me vrap drejt Lunës për ta përqafuar. Pas këtij momenti emocionues, ajo ndan edhe episodin e rënies së flokëve nga kimioterapia që fatmirësisht tashmë gjithçka ka kaluar dhe flokët po rikthehen.

Luna Methasani: Edhe për ta përfunduar, momenti shumë i vështirë psikologjik ishte kur të binin flokët. Aty pashë në pasqyrë një Luna që nuk e njihja, por i thashë vetes “ej Luna, ti je një version tjetër i imi me të cilin unë duhet të mësohem dhe që do të jesh forca ime për të vazhduar përpara”.

“I kërkova babit privatësi”, Luna Methasani flet e prekur për rrjedhjen e lajmit të sëmundjes

Historia e Lunës për diagnostikimin me kancer u bë publike si pasojë e rrjedhjes së lajmit. Vajza e gazetarit Dëfrim Methasani shprehet në “Ka Një Mesazh Për Ty” se dëshira e saj ka qenë gjithnjë që historia të mbetej private.

Luna pranon me dhimbje në rubrikën e së “Dielës Shqiptare” në Tv Klan se e ndien që kjo e ka rënduar së tepërmi të atin pasi nuk mund të kërkonte ndihmën që i duhej për të bijën. Veç kësaj, Luna tregon edhe trishtimin që ndjeu kur ndërkohë që përballej m sëmundjen, lexonte edhe komente të shumta që e lëndonin.

Luna Methasani:Lajmi rrodhi pa dashur, pa dëshirën time. I kisha kërkuar babit që të qëndrojmë privatë, mirëpo e ndiej që e kam lënduar shumë kur ia kam kërkuar këtë gjë sepse për shqiptarët e thjeshtë, përfshirë edhe familjen tonë, me rroga shteti është shumë e vështirë që të përballohen shpenzimet me shumë shifra, me shumë zero nga pas. Trajtimet mjekësore janë shumë të shtrenjta fatkeqësisht për këtë lloj sëmundjeje, ndaj përveç dhimbjes së madhe që kishte për një fëmijë të sëmurë, tim ati i duhej që të gjente forcën dhe mundësinë ekonomike për të përballuar këto shpenzime dhe nëse nuk do të dilte publikisht, e bënte akoma më të vështirë këtë gjënë. Sigurisht, miqtë e shumtë dhe emri i mirë që ka lënë kudo, e ndihmuan. Ndihmuan shumë familjarë,  farefisi, daja, halla dhe na u gjendën pranë në këto momente të vështira, por lajmi rrodhi. U preka shumë kur isha në spital dhe lexova komente të tipit “mirë, kjo është vajza e gazetarit, por për vajzat e një njeriu të thjeshtë kush do të mendojë?”

Ardit Gjebrea: Janë gjithmonë këto komente.

Luna Methasani: Sigurisht, por ia thashë për një arsye babit tim që të qëndrojmë në privatësinë tonë Ardit sepse fatkeqësisht ka shumë raste. Njerëz të shumtë që vuajnë, fëmijë edhe më të vegjël se unë, njerëz me probleme ekonomke, ndoshta edhe në ndihmë sociale dhe nuk kanë mundësi për të përballuar trajtime të tilla, kështu që ato para që mbase do duhej të shkonin për mua nëpërmjet një GoFund Me apo një thirrje publike, një aplikimi që mund të bëhej në ministri për fonde të shtetit, mendoja që mbase mund të shkojnë për një rast që vuan akoma më shumë apo që është më i vogël se unë. Prandaj dua ta ftoj sot që t’i kërkoj falje që mbase e kam rënduar pak gjatë këtij viti, por edhe ta falenderoj publikisht. Vajza dhe babi janë shokë të pandashëm, është shoku i parë, dashuria e parë dhe ashtu do të vazhdojë të mbetet gjithmonë.

“E ndiej që të kam rënduar”, mesazhi i ndjerë i Lunës për Dëfrim Methasanin

Me shumë lot dhe emocione ishte momenti i parë i ‘takimit’ babë e bijë përmes ekranit të “Ka Një Mesazh Për Ty”. Luna, vajza e gazetarit Dëfrim Methasani rrëfeu shumë episode të jetës së tij profesionale e familjare në rubrikën e së “Dielës Shqiptare” në Tv Klan si dhe sëmundjen e saj.

Viti i fundit ka qenë shumë sfidues për familjen e tyre pas diagnostikimit të Lunës me kancer, por fatmirësisht gjithçka ka kaluar. Luna u shpreh se i ka kërkuar të atit që gjithçka të mbetej diskrete, edhe pse më pas lajmi rrodhi. Megjithatë, ajo e ka ndier peshën e kësaj kërkese dhe sot ka një falenderim e mirënjohje të tejskashme që dëshiron t’ia përcjellë të atit.

Luna Methasani: Hej babito! Po kush më shumë sesa ti meriton një mirënjohje dhe një falenderim publik për gjithçka që ti ke bërë jo vetëm për mua, për familjen, për miqtë, për shokët, për fisin, për të gjithë ata që të njohën e të deshën, për të gjithë ata njerëz në nevojë që ti i ke ndihmuar? Se ti e ke zemrën shumë të madhe, shumë të bardhë dhe unë jam shumë e lumtur dhe krenare që jam edukuar me këtë frymë nga ti, patjetër edhe nga mami. E ndiej që vitin e kaluar të kam rënduar paksa sepse krahas dhimbjes së madhe që ndieje për evlatin tënd të sëmurë, kishe edhe përgjegjësinë e mbulimit të kostove shum të larta, me shumë zero nga prapa dhe ti i vetëm nuk do mund t’ia dilje nëse nuk do ishe ky Dëfrimi që je sot, me kaq shumë miq dhe që ke bërë kaq shumë për njerëzit e që po këto miq kaq të mirë, ky farefis kaq i madh që ti je ajo ura e komunikimit, që ti ke bërë kaq shumë për ta e ata nuk të lanë në baltë as këtë herë.

Kështu që dua të të them sot faleminderit që ekziston se je shoku im më i mirë, je energjia dhe forca që të gjithë ne, sidomos familja kemi nevojë të të kemi… falë teje, falë Zotit dhe falë mjekëve unë jam këtu sot, e ulur përballë teje duke të thënë që të dua pafund. Madje tani që je bërë gjysh je bërë edhe shumë argëtues, di të tregosh histori shumë të bukura imagjinare me Matiasin dhe Ninës sepse të paktën me ta po mbush atë kohën që për shkak të të gjithë angazhimeve të tua të shumta dhe sakrificave të mëdha që ke bërë në jetë nuk ke mundur të na mbash në krahë se na lije në gjumë e na gjeje në gjumë, por ja ku jemi sot se na ke edukuar të jemi njerëz të mirë, njerëz të besës, njerëz mirënjohës dhe mirënjohja më e madhe shkon për ty sot. Të paça sa malet dhe të dua shumë!

“Shihemi në Gjyq” – E moshuara endet prej 16 vitesh nëpër gjyqe

“Jam nënë e braktisur”, Kristina e përlotur përqafon Gjebrean/E bija refuzon të bëjë të njëjtën gjë

Seanca e radhës në “Shihemi në Gjyq” nisi tërësisht ndryshe. Kristina përballet në “Shihemi në Gjyq” me vajzën e saj, por në insertin prezantues të rubrikës së “E Diela Shqiptare” në Tv Klan, ajo nuk zbulon shumë gjëra.

“Jam një nënë e vetme. Kam 3  fëmijë.bashkëshorti më ka vdekur. Pas vdekjes së bashkëshortit më ka ndodhur një problem shumë i madh”.

Pasi hyn në studio, Kristina e përlotur i bën një kërkesë të veçantë Ardit Gjebreas që e çel seancën me një përqafim mes tyre.

Kristina: Përpara se të ulem në këtë karrige, unë dua të flas dy fjalë për ju zoti Ardit.

Ardit Gjebrea: Për mua?

Kristina: Po.

Ardit Gjebrea: Pse?

Kristina: Kam dëgjuar që kur flet për nënën, ti qan. Kurse unë jam një nënë e braktisur.

Ardit Gjebrea: Një nënë e braktisur.

Kristina: Mundem?

Ardit Gjebrea: Po më vika shumë keq. Më lër të të përqafoj pak.

Kristina: Faleminderit!

Pasi në studio bashkohet edhe Ilirjana, vajza e Kristinës, kjo e fundit i kërkon me ngulm një përqafim por vajza refuzon kategorikisht.

Kristina: Hajde të të përqafoj moj bijë!

Ilirjana: Jo!

Ardit Gjebrea: E përqafova unë dhe nuk e përqafon ti?

Ilirjana: Jo, jo.

Kristina: Kam një vit e gjysmë që nuk të kam parë. Të lutem!

Ilirjana: T’i lëmë komeditë.

Kristina: Të lutem, hajde të të përqafoj. Më ka marrë malli moj!

Ilirjana: Nuk mundem, nuk mundem. Për kapriçot e tua kam ardhur nga ana e anës me 100 halle, me 100 probleme.

Kristina: Çfarëdo halli që të kesh, jam nënë!

Ilirjana: Komeditë t’i lëmë!

“Më ke dërguar një letër tronditëse!”/Vajza i kërkon nënës t’i shlyejë borxhin: Shit shtëpinë!

Një shumë parash ka ndërhyrë në raportin nënë e bijë. Kristina i kërkon vajzës së saj, Ilirjanës në “Shihemi në Gjyq” me të cilën nuk është takuar prej më shumë se një viti që mos ta braktisë. Nga ana tjetër, Ilirjana ka ardhur në studion e së “Dielës Shqiptare” në Tv Klan me një qasje shumë të ftohtë ndaj nënës.

Kristina thotë se vajza i ka dërguar një letër ku i kërkon që deri në fund të prillit t’i shlyejë borxhin. Ilirjana thotë se është e detyruar pasi për shkak të vështirësive ekonomike dhe pamundësisë për të shkolluar vajzën, i nevojiten paratë.

Kristina: Vajzë, ti më ke sjellë një letër shumë tronditëse!

Ilirjana: Do të të sjell të tjera, edhe shumë të tjera do të të sjell.

Kristina: Jo… ti je vajza ime, nuk do të më braktisësh kurrë!

Ilirjana: Nuk ke vetëm vajzë, ke edhe dy fëmijë të tjerë. Nuk jam vetëm unë!

Kristina: Lëri fëmijët e tjerë!

Ilirjana: Përse t’i lësh? Je nënë e tre fëmijëve!

Kristina: Ti më ke thënë që do të të pleqëroj!

Ilirjana: Të pleqërosh, të kam shkruar letrën dhe e di shumë mirë se pse të kam shkruar.

Kristina: Bijë, atë letër që më ke shkruar ti unë nuk e shoh dot, e kam futur nën jastëk.

Ilirjana: Poshtë dyshekut, poshtë jorganit, ku të duash t’i vësh.

Kristina: Nuk të përgjigjem për atë letër që më ke dërguar.

Eni Çobani: Kristina, çfarë ka ndodhur të lutem?

Kristina: Ajo kërkon që unë të shes shtëpinë dhe t’i jap një borxh që ia kam marrë që në 2013-ën.

Ardit Gjebrea: Kujt i ke marrë borxh?

Kristina: Vajzës.

Ardit Gjebrea: Ku ka borxhe për nënën? Si mund të ketë borxhe për nënën?

Ilirjana: E di po unë ç’të bëj? Ç’të bëj zonjë, ç’të bëj? Ku të shkoj, jam me 100 halle? Kam një burrë invalid, vajzën 20 vjeçe, nuk  po mundem t’i jap shkollë, ta shkolloj.

Kristina: Unë jam nënë.

Ilirjana: Edhe unë jam bijë. Ç’të bëj? Po falimentoj. Zonjë e dashur, po falimentoj! Unë nuk mundem më të pres! Të kam pritur boll! Të kam pritur shumë! Nuk të pres më!

Eni Çobani: Ilirjana, i ke vënë afat nënës ti se s’po  të kuptoj? I ke vënë afat nënës?

Ilirjana: Po. Në fund të prillit, dua borxhin.

Në rast se nëna nuk i kthen dot borxhin, Ilirjana i thotë se do të shesë shtëpinë që të mund të marrë paratë.

Ilirjana: Unë doja ta regjistroja vajzën, prisja që të më paguhej borxhi dhe unë të regjistroja vajzën në shkollë. Nuk e regjistroj dot, jam e falimentuar. Mua ato para nuk m’i kanë falur.

Kristina: Po çfarë faji të kam moj vajzë?

Ilirjana: Zonjë e dashur, unë paratë nuk i gjej në rrugë.

Kristina: Unë shtëpinë nuk e shes.

Ilirjana: Do ta shesësh.

Kristina: Ashtu siç e ka ajo letër, unë nuk të përgjigjem dot ty..

Ilirjana: Do ta shesësh sepse unë jam bashkëpronare.

Kristina: Sa të jem unë gjallë jo.

Ilirjana: Atë do ta shikojmë! Përderisa unë jam bashkëpronare, do ta shes!

Eni Çobani shprehet e emocionuar: Pas humbjes së babait kuptova që nënën e kisha një thesar!

Një moment reflektimi dhe thirrjeje ndodhi në “Shihemi në Gjyq”. Pas shpjegimit të Eni Çobanit se Kristina me ndjekjen e gjyqit 16-vjeçar me motrën e saj do të mund t’i përfitojë pronat e dhuruara të babait që i takojnë me të drejtë si dhe që shtëpia bashkëshortore në Lezhë nuk mund të shitet nga vajza, Ilirjana, pati edhe edhe një kërkesë për këtë të fundit.

Deri në këtë moment, Ilirjana është treguar tepër e ftohtë ndaj nënës duke e quajtur “zonjë” dhe as nuk ka pranuar t’i afrohet e ta përqafojë. Në disa fjalë të saj, u kuptua që Ilirjana ruan mëri të vjetra ndaj Kristinës.

Ndërmjetësja e rubrikës të së “Dielës Shqiptare” në Tv Klan theksoi rëndësinë e nënës dhe sa ka ndryshuar ky koncept pas humbjes së të atit 9 vite më parë. Çobani e quajti veten me fat dhe e këshilloi Ilirjanën, e cila po ashtu ka humbur të atin, që të bënte të njëjtën gjë.

Eni Çobani: Ilirjana e dashur, unë sot ty nuk të flas si Eni juriste, unë të flas si Eni vajzë që kemi pasur fatin e keq që na është larguar mua 9 vjet përpara, juve 3 vjet më parë një prind shumë i dashur dhe i nderuar si babai, por ta quajmë veten me fat që kemi nënat gjallë. Nëna është e jashtëzakonshme! Nëna është një dashuri e jashtëzakonshme që në fakt Ardit, pas ikjes së babait e kam kuptuar më shumë. Pas ikjes së babait unë kam kuptuar që kam pasur një thesar në fakt, por kaq e madhe ka qenë dashuria ime për babain, jo që nuk e kam vlerësuar, por s’e kam parë ndoshta aq të plotë, ndërkohë pas ikjes së babait unë e quaj veten me fat që kam nënën akoma gjallë dhe e dua pafund dhe e përshëndes dhe uroj ta kem sa më gjatë në jetë.

Gjebrea lexon mesazhin e bashkëshortes/’Thyhet’ Ilirjana, ndodh përqafimi i pajtimit mes nënë e bijë

“Shihemi në Gjyq” u mbyll me një moment si asnjëherë më parë. Gjatë gjithë seancës, Ilirjana qëndroi tepër e ftohtë ndaj nënës së saj duke refuzuar çdo kontakt fizik me të.

Në përpjekjen e tij të fundit për të pajtuar nënë e bijë, moderatori i programit “E Diela Shqiptare” në Tv Klan lexoi një mesazh të dërguar nga bashkëshortja e tij që i përshtatej më së miri situatës. Mesazhi flet pikërisht për lidhjen nënë-vajzë dhe shkakton një përlotje të menjëhershme te të gjithë të pranishmit.

Ardit Gjebrea: Dhe vjen një ditë që e dëgjon veten të flasësh si ajo, të bërtasësh si ajo, të këndosh si ajo, të japësh mësim si ajo, të kërcesh  si ajo, të qash si ajo. Dhe vjen një ditë kur ato këpucët e mëdha që aq shumë i ke provuar, të bien fiks dhe ti mund të përshkosh gjurmën e saj dhe pas çdo hapi arrin të kuptosh gjithçka që dikur kritikoje dhe kupton kufijtë, sfidat, zemërimin, shqetësimin, frikërat dhe e falenderon që ishte atje për të qëndruar pranë teje, për të  të ruajtur,  për t’u kujdesur dhe falenderon mundësimet e saj,  sakrificat e saj, kohën e saj. vjen dita kur shihesh në pasqyrë dhe sheh atë sepse ne kemi qenë disa muaj brenda saj, por ti do të jesh gjithmonë brenda nesh.

Eni Çobani: Na bëre të lotojmë!

Më në fund, duket se përpjekja e Gjebreas arrin të ‘thyejë’ barrierën e Ilirjanës që menjëherë shkon te nëna dhe i jep përqafimin e shumëpritur.

Kristina: Po ti je vajzë, ti je vajza ime që do të më pleqërosh! Nuk kam tjetër! Nuk kam tjetër shpresë në këtë botë!

“Të Panjohurit” – Aurora Ferati