#EDielaShqiptare nga #ArditGjebrea prej vitit 2008 në #TvKlan, programi më popullor në të gjitha familjet shqiptare çdo të dielë. Një program i cili përfshin një fashë orari maratonë, prej 6 orësh transmetim.

“Udha e Shkronjave” – Nela vs Ardit

“Kujdes Shëndetin” – Trajtimi i infertilitetit, Liv Hospital

“Ka një mesazh për ty” – Gjesti fisnik i nënës me 2 fëmijë autikë

“Binjakët u diagnostikuan me spektrin e autizmit, bashkëshorti ndërroi jetë”, Valentina: M’u shkatërrua bota

Jeta e ka vendosur Valentinën përpara sprovave tmerrësisht të vështira. Në muajin e ndërgjegjësimit ndaj autizmit, historia e saj në “Ka Një Mesazh Për Ty” rrëfen sa sfiduese është kjo diagnozë, në rastin e saj me dy prej fëmijëve.

Gjatë viteve të trazirave në Shqipëri, Valentina tregon për rubrikën e së “Dielës Shqiptare” në Tv Klan se ndodhej në Greqi bashkë me familjen kur erdhën në jetë binjakët që sot janë 25 vjeç. Pas thuajse një viti, ajo kuptoi se diçka nuk shkonte dhe analizat treguan se të dy kanë spektrin e autizmit. Kjo nuk do të ishte e vetmja sprovë për familjen pasi bashkëshorti i Valentinës ndërroi jetë papritur.

Valentina: Lindin fëmijët binjakë, vijnë në jetë të dy, ishte gëzim i madh por diku në rritjen e tyre ngecën.

Ardit Gjebrea: Pas sa kohësh?

Valentina: Pas një viti gati. Kisha kuptuar që diçka nuk shkonte me rritjen e tyre, me zhvillimin e tyre mendor sesa fizik sepse fiziku i tyre ishte shumë i mirë. E kisha shprehur edhe te mjekët por më thoshin që mos u shqetëso se janë në rritje dhe mua më shqetësonte më shumë e folura e tyre sepse ata nuk belbëzonin.

Ardit Gjebrea: Ndërkohë që kishte eksperiencën me djalin e parë.

Valentina: Kisha sigurisht eksperiencë. Filluam menjëherë të bënim të gjitha ekzaminimet, të gjitha analizat që duheshin për këtë gjë dhe na thanë që kanë spektrin e autizmit të dy fëmijët.

Ardit Gjebrea: Të dy?

Valentina: Të dy. Aty na u shemb bota. E kemi përjetuar shumë keq. Dihet…

Ardit Gjebrea: Kalvari i gjatë…

Valentina: I vuajtjeve, ato mendonim, si do të jetë rritja e tyre, si do të jetë zhvillimi i tyre, si do të  luftojmë ne me ta, si do të ecnim me bashkë me ta? Nuk mjaftoi vetëm kjo, por pas 4 vitesh që kishim marrë diagnozën e fëmijëve, bashkëshorti humb jetën, largohet nga jeta nga një infarkt. Aty jeta ime u shkatërrua e gjitha.

Ardit Gjebrea: E vetme,  me tre djem.

Valentina: E vetme, me tre fëmijë sepse njerëzit e mi s’i kisha pranë, nuk dija nga t’ia filloja. Djali i madh e përjetoi shumë keq, ishte në moshën 16 vjeç sepse ishte shumë i lidhur me babain. Pastaj momenti që ai ndërroi jetë, ne e kishim pranë sepse ndërroi jetë në shtëpi.

Gjeste me zemër të madhe! Humbi prindërit nga kanceri, dhuruesja anonime përjetëson kujtimin e tyre

“Ka Një Mesazh Për Ty” është jo vetëm rubrika e së “Dielës Shqiptare” në Tv Klan ku ndahen rrëfime njerëzore, histori të rralla por edhe shembuj të veprave të mira njerëzore.

Pas rrëfimit të Valentinës dhe sfidave të saj si nënë e vetme binjakësh me spektrin e autizmit, e cila jo vetëm nuk ka mundësi financiare, por ka edhe vështirësi për t’i menaxhuar fizikisht dhe psikologjikisht të dy fëmijët, vjen një rreze shprese.

Moderatori i programit, Ardit Gjebrea ndan me të një histori. Një zonjë që jeton në Itali e cila brenda 3 viteve ka humbur dy prindërit për shkak të kancerit, ka shprehur dëshirën për të përjetësuar emrin e tyre.

Nëna e saj ishte një ndjekëse e rregullt e programit dhe dëshironte të ishte pjesë e tij, por kjo nuk ndodhi. Në kujtim të saj por edhe veprave të mira, zonja ka dhuruar një shumë simbolike për dikë që ka nevojë për këto para të cilat mbajnë emrin e prindërve. Gjesti fisnik pasohet edhe nga Valentina e cila këto para preferon që t’i kalojnë jo vetëm fëmijëve të saj, por qendrës “Lumturo dhimbjen” ku ata shkojnë së bashku me fëmijë të tjerë me spektrin e autizmit.

Ardit Gjebrea: Një zonjë e cila jeton në Itali, tregon se është bijë e dy prindërve të nderuar në qytetin e Durrësit. Babai i saj ka punuar si kryeinxhinier në kantierin detar dhe 10 vitet e fundit si kryeinxhinier i hekurudhave shqiptare, ndërsa nëna e saj ka punuar për 25 vite në Drejtorinë e Tatimeve dhe Taksave në Durrës. Në janar të vitit 2020, pas një lufte me kancerin, babai i saj ndërron jetë. Të paktën ajo u ndodh në Shqipëri dhe bashkë me nënën e saj,  e nderuan babain siç duhet. 

Por pas një viti, ishte tashmë nëna e saj që u diagnostikua me kancer dhe pas një lufte gati 2-vjeçare, edhe ajo në prill të vitit 2023, pra një vit më parë, u nda nga jeta. E bija shprehet këshut: “Nëna më grisi edhe atë cipë të hollë që ma mbante zemrën”. Dy vitet e fundit nëna e saj i kaloi në Milano ku një nga instrumentet kryesorë të shfokusimit nga sëmundja ishte “E Diela Shqiptare”.E bija tregon: “Mamaja ime  e ndiqte çdo episod nga 2-3 herë. Unë nuk kisha kohë që ta ndiqja për shkak të dinamikave të jetës dhe mami e komentonte programin me mua duke më bërë përmbledhjen e javës. Gjithmonë më thoshte që kishte shumë dëshirë të më sillte në “Ka Një Mesazh Për Ty”  dhe e gjithë bota le ta jetonte dashurinë dhe forcën që ne i jepnim njëra-tjetrës.

Por në 17 prill, mamaja e saj  e dashur kishte ditën e saj të 1-vjetorit të ndarjes nga jeta. Siç edhe janë traditat, organizohet një drekë apo një ceremoni me personat më të afërt, por e bija dëshironte shumë që për këtë ditë të shënuar të bënte diçka më kuptimplotë, një ndihmë monetare ndaj dikujt që ka nevojë për diçka dhe që do të jetë në kujtim të prindërve të saj të dashur. Ajo shprehet: “Do doja që bota ta dëgjojë sërish emrin e tyre dhe veprat e tyre të mira le të vazhdojnë edhe pas vdekjes”.

Ajo ka një buxhet simbolik dhe tha: “Dikush mund të ketë nevojë për këtë shumë dhe mund t’i hyjë në ndihmë. Nuk janë shumë, por mua më është dashur shumë mundim që t’i kursej ato para dhe do të kisha shumënevojë që ju të gjenit dikë që vërtet ka nevojë për një suport financiar”. Pasi ne i treguam historinë tuaj, ajo vendosi që këtë shumë të ta japë ty.

Valentina: Shumë faleminderit!

Ardit Gjebrea: Dhe mbi të gjitha, duke dhënë një shembull  për të gjithë, nuk dëshiron të shfaqet në program pasi dëshiron që të përmendet vetëm emri i prindërve, Vullnet dhe Lejla Pepellashi.

Valentina: Shumë faleminderit! qofshin të përjetshëm prindërit e saj!

Ardit Gjebrea: Faleminderit! Dhe në fund, na tha: “Askush nuk të përgatit sesi të përballesh me humbjen e një të afërmi, aq më pak të të dy prindërve. Nuk do doja kurrë të shfaqesha dhe të flisja për këtë temë, por do të doja jo vetëm të kujtoj figurën e tyre, por të realizoj dëshirën e mamasë  time për të qenë pjesë e programit tuaj dhe të solidarizohem me dikë”.

Valentina: Meqenëse ka qenë dëshira e zonjës, edhe dëshira ime është që kjo shumë t’i kalojë qendrës ku shkojnë fëmijët atje dhe marrin terapinë.

“Ka një mesazh për ty” – Mirënjohja përtej jetës

Vajza e sapolindur vdiq pas një jave, djali rrëfen sakrificën e nënës: Pranoi të shkëmbente jetën e saj për timen

Historia e Hyqmetit, siç shprehet ai në “Ka Një Mesazh Për Ty”, është e dhimbshme dhe shumë dramatike. Prindërit e tij janë nga Filati i Çamërisë, ndërsa vetë ka lindur në Tiranë. Hyqmeti e nisi rrëfimin e tij për rubrikën e së “Dielës Shqiptare” në Tv Klan me jetën e prindërve. Nëna e tij mbeti jetime në moshën 13-vjeçare. Në vitin 1942 u martua me babain e Hyqmetit, por pas një viti e gjysmë ai u internua në kampin nazist të Mauthauserit.

Për dy vite, nëna e Hyqmetit nuk dinte asgjë për të shoqin. Pas dy vjetësh ai rikthehet dhe u gjend përpara dilemës, të kthehej te e ëma në Stamboll apo te bashkëshortja në Delvinë. Fitoi zemra dhe u kthye te bashkëshortja duke i sjellë asaj gëzimin më të madh. Çifti vendosi që të linte Delvinën  dhe të shpërngulej në Peqin, por jeta kishte rezervuar sprova përpara se t’i bekonte me një fëmijë.

Hyqmet: Atje lindi fëmija i parë se një çift i ri do trashëgimtarë. Lindi fëmija i parë, një vajzë e bukur por që një javë jetoi. Një trishtim i madh për nënën dhe babanë. Pse ishte trishtim për nënën? Sepse motra e saj, më e madhja bëri 9 fëmijë dhe nuk i rroi asnjë nga fëmijët, fatkeqësi e madhe!

Ardit Gjebrea: Dhe mendoi se mos ishte diçka që vinte në familje.

Hyqmet: Pyeti një nga njerëzit e familjes ku ishim të futur me qira dhe i thotë që “ti do ta çosh Nailen, në Tiranë ka një doktor shumë të mirë, quhet Koço Gliozheni”.

Ardit Gjebrea: I famshmi!                                                              

Hyqmet: I  famshmi Koço! Vjen në Tiranë te disa njerëz të vet, me njohje e çon te materniteti se u bënë 10 vjet pa fëmijë. Dëshira e madhe e një nëne për të pasur një fëmijë, më në fund vjen fati i madh, shtatzënë, duhet të lindte por doktori i thotë që “ajo duhet të shtrohet këtu në Tiranë”. Vjen momenti, 2-3 ditë përpara, vjen doktori, alamet burri, me prezencë, me autoritet, ai kishte emrin e madh, kishte edhe punën e madhe, profesionin e madh, mjeshtërinë e madhe por kishte edhe zemrën e madhe!

Ardit Gjebrea: Çcfarë i thotë nënës?

Hyqmet: “Zonjë, si je? Mirë. E di ti që me  lindjen e këtij fëmije ti rrezikon jetën tënde? Doktor, nuk e di, por fëmija si është? Fëmija është mirë, thotë. Le të vdes doktor”, thotë. Hapi sytë doktori.

Ardit Gjebrea: Për veten e saj.

Hyqmet: Po. Si mund të thotë një grua të vdes se do lindë fëmijën? “Po pse kërkon ta bësh një sakrificë të tillë? E bëj për burrin”, tha, “edhe për veten, por e bëj në radhë të parë për burrin. Pse?”, tha. “Po burri im ka qenë i internuar në Gjermani dhe kur erdhi një Janinë nuk shkoi te nëna e vet në Stamboll se u prish Çamëria dhe erdhi më gjeti mua se jam grua pa vëllezër, kam mbetur jetime”.

Ardit Gjebrea: E paparë!

Hyqmet: “Edhe një motër që kam, i lindën fëmijët dhe i vdiqën. Nuk dua ta lë pa fëmijë”.

Ardit Gjebrea: Domethënë ishte kjo sakrifica që ai erdhi tek unë dhe e bëri të tijën, tani unë do t’i jap një fëmijë dhe ai le të shkojë te nëna, me fëmijë. Sa bukur!

Hyqmet: Po. Dhe profesioni i një doktori, një gjinekologu është i tillë që t’i japë jetë fëmijës, t’i japë jetë nënës.

Ardit Gjebrea: Dhe si përfundim?

Hyqmet: Linda unë më 7 nëntor.

Ardit Gjebrea: Dhe nëna?

Hyqmet: Iu gëzua fëmijës dhe fëmija iu gëzua nënës.

Ardit Gjebrea: Dhe jetuan të dy!

“O djali, o ti”/Gjebrea ndan historinë që e bashkon me Hyqmetin

Pas transmetimit të insertit ku dr. Orion Gliozheni merr ftesën për të ardhur në “Ka Një Mesazh Për Ty” që ai e pranon me shumë kënaqësi, pati një moment shumë special. Moderatori i programit “E Diela Shqiptare” në TV Klan, Ardit Gjebrea vlerësoi punën e bluzave të bardha por ndau edhe një episod personal.

Njësoj si Hyqmeti i cili është ai që ka ftuar dr. Orionin pasi babai i tij, Koço Gliozheni ka bërë të mundur që ai dhe nëna të tejkalonin lindjen e vështirë dhe të jetonin. Gjebrea rrëfeu se edhe historia e tij është e njëjtë me Hyqmetin pasi nëna e tij u gjend përpara rrezikut për jetën, por fatmirësisht të dy shpëtuan.

Ardit Gjebrea: Kam patur fatin, them kam patur fatin ta takoj. Ne në fakt na shkruajnë shumë por shumë pacientë nga më të ndryshmit sepse mirënjohja për mjekët nuk mbaron dhe zakonisht themi mejkët nuk është se nuk ua krijojmë këtë shans sepse mjekët sa herë që vijnë thonë “bëjmë detyrën” dhe jam i sigurt, doktor Orioni nuk a dëgjon, jam i sigurt që edhe kur të vijë këtu do të thotë “babai im ka bërë detyrën, unë kam bërë detyrën” por rasti juaj ishte shumë specifik, pse jo, në një moment të veçantë e trajtojmë edhe ne shumë dashuri. Ndoshta-ndoshta edhe për faktin që ne të dy na bashkon e njëjta histori, e njëjta histori që ka ndodhur me ty ka ndodhur edhe me nënën time. Edhe ajo ka firmosur, edhe asaj i thanë që “o djali, o ti” dhe ajo tha që “le të lindë djali” dhe për fat, jetuam të dy.

Hyqmet: Dhe fati e do që të jemi ballë për ballë.

Koço Gliozheni i shpëtoi jetën nënës dhe fëmijës, Hyqmeti i shpreh mirënjohjen djalit të tij

Një histori shumë e veçantë u rrëfye në “Ka Një Mesazh Për Ty” nga Hyqmeti. Veç vështirësive që ka patur jeta e prindërve të tij, lindja e Hyqmetit përbënte rrezik  si për të, ashtu edhe për nënën. Mes emocionesh, Hyqmeti tregoi se si ishte mjeku Koço Gliozheni ai që shpëtoi nënë e bir.

Për këtë arsye, ai ka ftuar në rubrikën e së “Dielës Shqiptare” në Tv Klan, djalin e tij, Orion Gliozhenin në shenjë mirënjohjeje ndaj veprës që ka lënë pas babai i tij. Sapo hapet ekrani, dr. Orioni ndan edhe një detaj tjetër nga takimi i tij me Hyqmetin.

Dr. Orion Gliozheni: Prapë në njëfarë mënyre lidhet me profesionin tonë, por këtë radhë është im atë që ka qenë një nga themeluesit e shkollës së Obstetrikës dhe Gjinekologjisë në Shqipëri dhe që me Hyqmetin ka një histori shumë të bukur, as unë nuk e kam ditur, e kam marrë vesh kur jam njohur me Hyqmetin vite përpara dhe kam edhe në zyrën time një tablo të madhe ku Hyqmeti ka shkruar shumë bukur dhe të përmbledhur se çfarë vuajti nëna e tij për të lindur Hyqmetin.

Më pas, Hyqmeti i shprehu mjekut mirënjohjen e tij të thellë dhe të përzemërt.

Hyqmet: Doktor Orioni, të përshëndes! Kam shumë kënaqësi që të kam përballë dhe në një studio të tillë.  Mirënjohje! Unë dua të shpreh mirënjohje për atë burrin e madh për atë doktorin e famshëm, për atë gjinekologun me emër që më dha mua  jetë, më shpëtoi nënën që unë mos të rritesha jetim ndaj dhe e kisha si një detyrim moral, si për t’i thënë asaj nënës time që unë ia përcolla mirënjohjen, jo doktorit, por të birit. Të falenderoj që të kam përballë dhe të shpreh këtë mirënjohje!

Dr. Orion Gliozheni: Faleminderit ty! Ishte vërtet  një surprizë, mendova se do të ishte ndonjë grua që ka lindir, që ka pasur probleme por gjithseis nuk jemi larg edhe këtij skenari por kjo juaja është vërtet një histori shumë e bukur që i përket ca viteve kur edhe kushtet e mjekësisë nuk ishin të njëjta me ato që kemi sot. Sot mund të bëhet ndoshta më tepër sesa ç’mund të bëhej atëherë kur mjekët kishin vetëm stetoskopin në dorë dhe vinin diagnozën në bazë të shenjave klinike, pa pasur një ekografi, skaner siç janë sot etj.

Hyqmet: Prandaj është i madh doktor Koço Gliozheni dhe ju të jeni krenar për atë baba që i dha emër vetes, familjes por la atë mesazh të madh që doktorët dhe sidomos gjinekologët, janë ata që dinë të bëjnë më të mirën për jetën!

“E kam dy herë jetën nga ai”/ Dr. Orioni ndan historinë e veçantë me babain, Koço Gliozhenin

Mjeku i njohur Orion Gliozheni ndau disa kujtime me babain e tij, Koço Gliozhenin në rubrikën “Ka Një Mesazh Për Ty”. I pyetur nga moderatori i së  “Dielës Shqiptare” në Tv

Klan, Ardit Gjebrea se si kanë qenë raportet me të, mjeku rrëfen se pavarësisht ngarkesës së të atit, të dy kishin një lidhje shumë të afërt. Jo vetëm kaq, por babai i tij i ka dhënë jetë dy herë pasi ka qenë dr. Koço ai që mundësoi lindjen e të birit.

Dr. Orion Gliozheni: Në kohën që ai ka punuar, ka pasur pak mjekë të vjetër dhe me eksperiencë kështu që ia mori edhe shtëpinë shumë afër me maternitetin pasi pothuajse çdo natë, çdo ditë e thërrisnin në spital. Për pasojë, koha që mbetej për të ndenjur me neve ishte pak, merrej kryesisht mamaja por atë kohë që ai gjente, ishte shumë i afërt, shumë. Unë kisha raporte veçanërisht shumë të ngrohta me të të cilat i kujtoj edhe sot me një përmallim e një kënaqësi të madhe.

Ardit Gjebrea: Juve ju ka sjellë ai në jetë?

Dr. Orion Gliozheni: Po.

Ardit Gjebrea: Pra ti ke lindur nga duart e babit tënd?

Dr. Orion Gliozheni: Kam lindur nga duart e babait pasi edhe kjo ka qenë një histori e bukur. Unë isha me peshë të madhe, lindja pati vështirësi, ishte një mjek rus në atë kohë dhe hyri ai për t’i asistuar mamasë time dhe babai normalisht priste jashtë në korridor. Ai u mundua e u mundua, doli jashtë e i tha nuk arrij dot. U fut babai vetë dhe nëpërmjet një instrumenti që quhet forceps më nxori kështu që unë e kam dy herë jetën nga babai, e para sepse jam djali i tij, e dyta sepse më nxori në jetë nga mamaja. Është vërtet një histori e bukur.

“Shihemi në gjyq” – Motra zapton shtëpinë e vëllait

“Nuk besoj të ndahen më”, Eni Çobani jep lajmin e bukur për Kristinën dhe Ilirjanën

Përpara prezantimit të seancës së radhës, Eni Çobani risolli në vëmendje konfliktin e javës së shkuar që u trajtua në “Shihemi në Gjyq”. Ndërmjetësja e rubrikës së “E Diela Shqiptare” në Tv Klan dha lajmin e bukur se Kristina dhe Ilirjana, nënë e bijë që patën një konflikt të fortë, me shumë lot, tashmë janë bashkë.

Përtej pajtimit në fund të seancës, ato janë të pandara pavarësisht se Kristina po jeton në Lezhë ndërsa vajza është kthyer në Itali. Në fund, Çobani shprehu edhe mirënjohje ndaj moderatorit Ardit Gjebrea, i cili gjithashtu dha mesazhe shumë të rëndësishme për marrëdhëniet prind-fëmijë, si dhe dhuroi momente emocionuese me të moshuarën.

Eni Çobani: Vijmë nga një javë që njerëzit realisht kanë përcjellë një mesazh shumë të madh nga historia e zonjës Kristina me vajzën dhe realisht, sikundër jo në shumë raste, ma kanë përcjellë me shumë dhimbje që si është e mundur që edhe vajza, se mirë djemtë, ndoshta kemi trajtuar shumë raste, por deri te vajza nuk kishim shkuar që refuzonte dashurinë e nënës por unë dua t’i them gjithë publikut që pas asaj seance, nuk e di sesa e keni ndjekur fundin e saj se unë e kam transmetuar që Kristina është bashkë me vajzën, pra nuk janë ndarë dhe nuk besoj të ndahen më. Sigurisht që njëra jeton akoma në Lezhë, pra zonja Kristina dhe u largua vajza në Itali, por gjithmonë vëmendja dhe dashuria kundrejt nënës është e pandarë. Për këtë ju garantoj që nënat, vajzat por sigurisht edhe djemtë janë të pandarë. Është një dashuri e pafundme mes tyre dhe kështu duhet të jetë, kështu që faleminderit edhe Arditit për gjithë atë ndjesi dhe emocion të bukur që dha si djalë në atë seancë.

“Mysliman jam unë, marr deri në 7 gra”/Gruaja s’duron, i ‘vërsulet’ burrit

Pranvera dhe Jetnori janë të martuar prej 30 vjetësh, por martesa e tyre ka hasur një konflikt të fortë. Pranvera ankohet në “Shihemi në Gjyq” se ai e ka lënë jashtë pasurisë, edhe pse së bashku kanë tre fëmijë. Vazhdimisht ajo shpreh një frikë se Jetnori do të largohet dhe ky i fundit i jep një përgjigje befasuese që habit studion e sëe “Dielës Shqiptare”  në Tv Klan.

Eni Çobani: Ti çfarë frike ke, që ky mund të ikë diku tjetër?

Pranvera: Po normale, ikën merr tjetrën ai.

Jetnor: Po tani, mysliman jam unë, myslimanët e kanë deri në 7 gra.

Pranvera: Ça myslimani je more?

Eni Çobani: Mos ua vini myslimanëve këtë, nëse ti ke dëshirë është tjetër gjë, por mos e vishni këtë  me një emër të caktuar. Se të ka vajtur mendja ty të marrësh tjetër, është problemi yt, jo i myslimanëve.

Pranvera: Për çfarë kam punuar këto 30 vjet?

Eni Çobani: Moj zonjë, dyshon te bashkëshorti ti? Ka ndonjë gjë se edhe kjo tani, të jetosh 30 vjet, të jeni në këto mosha që jeni se nuk jeni edhe fare të rinj, po sigurisht të rinj jeni patjetër se unë nuk them, secili e ndien veten ashtu siç do se jeni bërë gati gjyshër.

Ardit Gjebrea: Si është kjo puna e myslimanëve të lutem se edhe publiku e shoh që po reagon?

Jetnor: Unë  e thashë për një tip batute atë se gruaja thotë që unë do ta lë nesër. Për çfarë do ta lë unë atë, unë kam 30 vjet martesë me atë, ajo mendon gjënë e keqe, prandaj ia thashë, në atë kuptim ia thashë. Për çfarë e mendon gjënë e keqe, unë kam këtu e 30 vjet me atë, ajo mendon që unë mund ta lë nesër, për çfarë, se s’po i lë pjesën?

Ardit Gjebrea: Zonja Eni më fal. Është e vërtetë kjo puna e myslimanëve?

Pranvera lëviz nga vendi dhe shkon drejt Jetnorit duke turfulluar.

Ardit Gjebrea: Prit, prit se na erdhi Pranvera!

Pranvera: Të lutem shumë! Ti nuk po më jep rrugëzgjidhje!

Jetnor: Çfarë rrugëzgjidhjeje? Atë e di unë se si t’i jap rrugëzgjidhje!

Pranvera: 10 vjet që kam ndenjur në atë shtëpi, kam ardhur në datën 6 janar zotëri, dera nuk më është hapur te shtëpia në Durrës, lagjja 13, plazh.

Eni Çobani: Pse s’të është hapur moj zonjë se desh iu vërsule Jetnorit tani?

Pranvera: I vërsulem se është motra e burrit tim, Merita Reçi.

“Do marr tjetër”/Pranvera ‘kërcënon’ Jetnorin me shishe: Më le 6 vite vetëm me vjehërrit!

Deklarata e Jetnorit se “është mysliman, mund të marrë deri në 7 gra”, i ka shtuar revoltimin gruas së tij, Pranverës. Ajo e ka sjellë që të përballen në rubrikën e së “Dielës Shqiptare” në Tv Klan, “Shihemi në Gjyq” që ai ta përfshijë në pasuri pasi kanë 30 vite bashkë dhe 3 fëmijë, por emri i saj nuk gjendet  në asnjë dokument.

E acaruar, Pranvera nis t’i rendisë bashkëshortit të saj gjithë kontributin e saj në këtë martesë ku tregon se si për 6 vite ka qëndruar vetëm me vjehërrit pasi Jetnori ndodhej në Itali. Veç kësaj, ajo i dorëzonte edhe pagën vjehrrit.

Eni Çobani: Gratë janë bërë të zgjuara sot. Nuk ka gra t’ia hedhësh ti edhe të tjerët. Gratë sot i dinë mirë gjërat, kanë nja 12 vjet që më dëgjojnë mua këtu dhe gratë janë bërë tani si zonja që ke përballë, duan pranë o zotëri se ty të ngrihet mendja nesër, merr një tjetër, këtë e lë mes 4 rrugëve. Kjo duhet të jetë e siguruar.

Pranvera: Çfarë the zotëri?

Eni Çobani: Që mund të marrë tjetër.

Pranvera: Që të marrësh tjetër?

Pranvera merr shishen e ujit në dorë.

Eni Çobani: Jo, jo, jo me shishe uji!

Pranvera: Çfarë, do marrësh tjetër? po 30 vjet kush ka punuar te  ty more zotni? 30 vjet kush ka punuar zotrote?

Jetnor: 30 vjet ke ngrënë, të kam trajtuar si grua, çfarë do më shumë ti tani? ça pronash do?

Pranvera: Më ke lënë me tre kalamajtë, më ke lënë me vjehrrën, më ke lënë me vjehrrin, vinte kunata poshtë e përpjetë me kalamajtë e vet, tani unë ç’kusur ta kisha?

Jetnor: Më lër rehat atje!

Pranvera: Zotni,  kam punuar për 10 vjet në Xhafzotaj,  merrja rrogën!

Eni Çobani: Si ke punuar?

Pranvera: Kam punuar në Xhafzotaj, ishte firmë italiane, merrja 400 mijë lekë në muaj ia dorëzoja vjehrrit zonja Eni.

Eni Çobani: Po ky ku ishte?

Pranvera: Ky iku në Itali moj zonja Eni!

Eni Çobani: Po ti jetoje me vjehrrrin?

Pranvera: Unë jetoja me vjehrrin, me vjehrrën se s’kisha letra, ku do shkoja unë zonja Eni, kisha edhe 3 fëmijë të mitë. Ku të shkoja? Të shkoja te babai?

Jetnor: Të ikje te babai pastaj.

Pranvera: Si të ikja te babai? Babai më dha burrë, më martoi!

Jetnor: Unë kam qenë pa letra.

Eni Çobani: Sa vite e le zonjën këtu?

Jetnor: 6 vjet.

“Ku ka besë e fe sot?”/Pranvera e bindur se Jetnori mund ta tradhtojë, si ia kthen ky i fundit

Në përfundim të seancës së “Shihemi në Gjyq”, rezulton se çështja e zaptimit të pronës nga motra e Jetmirit është plotësisht e zgjidhshme dhe do të ndiqet nga ndërmjetësja Eni Çobani. Më i rëndësishëm për moderatorin e së “Dielës Shqiptare” në Tv Klan, Ardit Gjebrean është pajtimi i çiftit Pranvera dhe Jetnor.

Ai i kërkon ndërmjetëses që ta bindë Jetnorin për t’i dhënë Pranverës gjysmën e pasurisë sepse ka patur kontributin e saj në këtë martesë 30-vjeçare. Pranvera është shumë mosbesuese, por edhe Jetnori ‘kujdeset’ që t’ia përforcojë ndjesinë se ai mund edhe të gjejë një tjetër, siç u shpreh gjatë seancës.

Pranvera: Kush bindet more zoti Ardit?

Ardit Gjebrea: Do bindet, do bindet.

Pranvera: Ta shohim.

Jetnor: Ku ka besim, ishalla kap tjetër thotë.

Ardit Gjebrea: S’ke besim te gruaja ti?

Jetnor: Ajo thotë ti ik kap tjetër. ashtu mendoj edhe unë për atë. Kështu i bie. Unë  pomundohem që të arrijmë në një pikë të përbashkët.

Eni Çobani: Si në një pikë të përbashkët, që ti të mbash pronën dhe kjo të punojë? Do ta mbajmë pronën të dy, atëherë do të shkojë mirë.

Jetnor: Atë do ta diskutojmë.

Ardit Gjebrea: Pranvera, ti mendon që Jetnori mund ta bëjë këtë gjë?

Pranvera: Edhe e bën!

Ardit Gjebrea: Jo, jo, duke e njohur Jetnorin.

Pranvera: Kam 30 vjet që e njoh.

Ardit Gjebrea: Dhe ti pas këtyre 30 viteve mendon që Jetnori mund të kapë dikë tjetër?

Pranvera: Edhe e kap! Burrë është, çfarë të bëj unë pastaj? Ku të vete? Ku do shkoj?

Ardit Gjebrea: Ti ke 30 vjet që e njeh karakterin e tij. Me karakterin që ka…

Eni Çobani: Mund të të tradhtojë ty?

Ardit Gjebrea: Mundet apo jo?

Pranvera: Po ku ka besë e fe sot o zoti Ardit!

Jetnor: A, unë ia kam thënë gruas që në fillim. Bëj si them unë, por mos bëj si bëj unë!

“Të Panjohurit” – Mika Paci

/tvklan.al