Ministri i jashtëm grek, Nikos Kotzias zbuloi se negociatat për zgjidhjen e mosmarrëveshjeve me Shqipërinë janë aktualisht të bllokuara. Arsyet i bëri publike gjatë një konference për shtyp në Athinë me homologun gjerman Heiko Maas.
“Ne i bëmë negociatat me Shqipërinë. Dhe siç e dini, tani janë bllokuar jo nga ne, as nga ministria e Jashtme atje, por nga problemet administrative që ata kanë, për shkak të mosmarrëveshjes mes presidentit të këtij vendi dhe qeverisë. Shkak është edhe mosfunksionimi i Gjykatës Kushtetuese, që aktualisht nuk siguron dot kuorumin”.
Kotzias shpalosi edhe qëndrimin e Athinës për propozimin për korrigjimin e kufijve mes Kosovës dhe Serbisë.
“
Ne nuk duam të ketë ndryshim kufijsh në rajon. Jemi kundër akteve që mund të çojnë në një efekt domino negativ. Por urojmë që të dy shtet t’i zgjidhin problemet e tyre. Dhe sigurisht, u përket vetë atyre të gjejnë mënyrën se si do t’i zgjidhin”.
Ministri i jashtëm gjerman Heiko Maas ndodhet në një tur ballkanik të nisur të hënën me Shkupin, ku shprehu mbështetjen e fuqishme për marrëveshjen për emrin me Athinën përpara referendumit të 30 Shtatorit, një çështje që u diskutua edhe gjatë vizitës në Athinë.
Tv Klan
