Ndeshja me Anglinë me dyer të mbyllura
Kërkesa e Federatës Shqiptare të Futbollit për lejimin e tifozëve në stadiumin “Air Albania” për ndeshjen kualifikuese të Kampionatit Botëror, Katar 2022 ka rënë në vesh të shurdhët. Në një përgjigje të dërguar nga Ministria e Shëndetësisë drejtuar FSHF-së nuk e ka pranuar kërkesën, duke mos lejuar tifozë për këtë ndeshje, e cila tani do të luhet me dyer të mbyllura.
“Zhvillimi i këtij aktiviteti sportiv me pjesëmarrje të spektatorëve konsiderohet me rrezikshmëri të lartë për përhapjen e infeksionit Covid-19, kjo për shkak se shoqërohet me grumbullime njerëzish,” thuhet në dokumentin e siguruar nga Klan News.
FSHF kishte kërkuar lejimin e kufizuar të spektatorëve në masën 30 % të kapacitetit të stadiumit, praktikisht 6500 spektatorë. Ndeshja mes Shqipërisë dhe Anglisë, e vlefshme për eliminatoret e Botërorit, është planifikuar të zhvillohet më 28 Mars.
Klan News
