Duhen më pak se dy muaj që nga hapja zyrtare e Kampionatit Europian 2024, por që tani kanë nisur parashikimet e ndeshjeve, bazuar në objektivat e skuadrave dhe grupet ku janë shortuar. I cilësuar si më i forti, grupi B ku bën pjesë edhe Shqipëria, tërheq vëmendjen me sfidat që do të propozojë.
Një vëmendje e veçantë i kushtohet ndeshjes së parë, Itali-Shqipëri. Për skuadrën e Spalletti kjo cilësohet si sfida jetike, e cila, në varësi të rezultatit mund t’u hapë një disa mundësi. Si Spaletti ashtu edhe Sylvinho duket se janë të lumtur me modulin 4-3-3. Ky rreshtim garanton më shumë qëndrueshmëri të skuadrës duke dhënë mundësinë e aktivizimit të disa mesfushorëve. Sa i përket atyre italianë, talenti është me shumicë, me një mesatare mbi 60% të mbajtjes së topit dhe me aftësinë e organizimit të kundërsulmeve.
E nëse nga mediat Italia vlerësohet në të gjithë elementët e skuadrës, për Shqipërinë konsideratat janë për trajnerin.
Sylvio Mendes Campos Junior, i cili pak ditë më parë festoi 50-vjetorin e lindjes, me Kombëtaren Shqiptare në Euro 2024, i shton karrierës së tij një tjetër kapitull të shkëlqyer. Rrugëtimi i tij si futbollist në disa nga klubet më të mirë në Europë dhe si pjesë përbërëse në stafe teknike deri tek Kombëtarja e Brazilit, ka kulmuar me kualifikimin e Shqipërisë në Euro 2024.
Ndeshja kundër Italisë nënvizon një mundësi të mirë dhe shtrirjen e rrugës profesionale të Sylvinho, pas arritjeve të ndryshme që kanë përcaktuar rrugën e tij drejt pikës më të rëndësishme në karrierë, në vitrinën e kualifikimit në Europian.
Tv Klan
