Nëse refuzohet ekstradimi, 48-vjeçari fiton lirinë
Pak ditë pas arrestimit të Plaurent Dervishtaj në Dubai dhe Indrit Taullait në Kosovë, si të përfshirë në dy atentate mafioze të 15 viteve më parë, SPAK ka kërkuar ekstradimin e tyre drejt vendit tonë. Taullau pritet që të ekstradohet nga Kosova drejt vendit tonë, por ndryshe është situata për Dervishajn, për shkak se mungon marrëveshja e ekstradimit mes dy vendeve.
Për këtë, Prokuroria Shqiptare shpreson që të ndjekë parimin e reciprocitetit duke kryer shkëmbimin e të arrestuarve mes dy vendeve. Në kërkesën drejtuar autoriteteve në Dubai, pala shqiptare ka dhënë garanci se do të bashkëpunojë me drejtësinë e këtij vendi për të shkëmbyer mes tyre personat në kërkim.
Deri më tani nuk ka një përgjigje zyrtare dhe nëse refuzohet ekstradimi i Dervishjat, ai pritet të fitojë lirinë. Ai u arrestua dy javë më parë pasi ishte shpallur në kërkim ndërkombëtar për vrasjen e Vajdin Lames e Klodian Saliut, ngjarje të ndodhura në fund të Shkurtit të 2005.
Pas 15 vitesh, SPAK rihapi këto dy dosje pas dëshmisë së Luftar Raçit që ka treguar edhe emrat e Lulzim Berishës, Indrit Taullait, Emiljano Shullazit, Plaurent Dervishajt, Indrit Rusit dhe Vikor Ymerit, si të përfshirë në këtë dy ngjarje. I vetmi person që vazhdon ende të jetë në kërkim është Lulzim Berisha, për të cilin ka dyshime se fshihet në Gjermani.
Tv Klan
