Drejtori i Përgjithshëm i Policisë së Shtetit, Ardi Veliu zhvilloi këtë të premte një takim me strukturat e Drejtorisë Vendore të Policisë Shkodër.
Gjatë këtij takimi, Veliu shprehu vlerësim për 2 goditjet e fundit në kuadër të operacionit “Forca e Ligjit”, për drejtuesit dhe ekipin, për zbardhjen e ngjarjes me eksploziv. Ai inkurajoi punën e policisë dhe dha mbështetje për rezultate të tjera.
Sipas një njoftimi të Policisë së Shtetit, Veliu mësohet se vlerësoi dhe inkurajoi bashkëpunimin e Prokurorisë së Shkodrës me Policinë dhe tha se është një model që duhet shpërndarë dhe krijuar në çdo qark.
Kreu i Policisë së Shtetit zhvilloi gjithashtu edhe një takim me Prokurorin e Rrethit Shkodër, Anton Martini. Ky i fundit vlerësoi bashkëpunimin me policinë vendore dhe punën profesionale të bërë bashkarisht për zbardhjen e ngjarjes.
Nga ana e tij, Veliu falenderoi Prokurorin për ndihmën dhe mbështetjen, si dhe theksoi se
“puna jonë ka sukses kur punojmë bashkarisht”
.
Edhe Drejtori Vendor i Policisë, Gjovalin Loka vlerësoi bashkëpunim me Prokurorinë.
Të enjten autoritetet njoftuan zbardhjen dhe kapjen e autorëve të ngjarjes së ndodhur më 13 Janar në lagjen “Rus” të Shkodrës, ku një atentat me tritol ndaj 42-vjeçarit Lulzim Kullës çoi në plagosjen e 8 personave.
/tvklan.al
