Video/ Rëndohet situata në Komision, Noka tenton të nxjerrë jashtë Kryetarin Erion Veliaj

Është tensionuar situata në Komisionin e Medias, aty ku po zhvillohet seanca dëgjimore lidhur me prishjen e Teatrit Kombëtar. Deputeti demokrat Flamur Noka është ngritur nga karrigia dhe ka tentuar të nxjerrë me forcë kryetarin e bashkisë së Tiranës Erion Veliaj.

Menjëherë janë ngritur nga karriget deputetet Klevis Balliu, Ervin Salianji, Enkelejd Alibeaj, ish- ministri i Shëndetësisë Ilir Beqaj si dhe deputeti Luçiano Boçi.

Që në nisje seanca dëgjimore ka pasur akuza dhe debate mes Kryetares së Komisionit Albana Vokshi si dhe kryetarit të Bashkisë Erion Veliaj.

Vokshi ka kërkuar që Veliaj të largohet nga Komisioni, pasi është thirrur vetëm ministrja Mirela Kumbaro në seancë dëgjimore. Gjithashtu kryetarja e Komisionit kërkoi nga kreu i Kuvendit Gramoz Ruçi që të nxjerri jashtë Veliajn.

Komisioni është pezulluar disa herë, për të rifilluar më pas me debate.