Lajme Arkiva 2004
Përcaktimi i qartë i rolit të 11 minibashkive të Tiranës ishte thelbi i takimit që u zhvillua në Ministrinë e Pushtetit Vendor dhe Decentralizmit. Në takim ku merrnin pjesë edhe kryetarë të PD-së për Tiranën, Ulqini dhe Minarolli, ministri Blushi theksoi se ligji nuk është konsumuar ende plotësisht.
Ka vend për përmirësim në drejtim të kalimit të kompetencave sa më parë banorëve. Qëllimi ynë u shpreh ministri nuk është dobësimi i Bashkisë së Tiranës por forcimi i saj përmes ndarjes së kompetencave të niveleve të ndryshme të administrimit.
Kryetarët e minibashkive i kërkuan ministrit Blushi hartimin e një marrëveshje me Bashkinë e Tiranës e cila të përcaktojë qartë ndarjen e kompetenca në favor të dy palëve.
Ata u shprehën të gatshëm për të marrë përsipër vjeljen disa takave apo tarifave vendore. Kërkuan që tu kalojë në administrim mirëmbajtja e shkollave, kopshteve çerdheve, ambulancave, këndeve të lojërave, terreneve sportive, bibliotekave etj.
Kryetarët e minibashkive kërkuan gjithashtu që njësia bashkiake, të ketë të drejtën e supervizionit për të gjitha punimet dhe shërbimet që kryhen brenda territorit të saj.
Ministri i Pushtetit Vendor sqaroi se është këshilli bashkiak ai që vendos për kompetencat që i delegohen minibashkive. Ndërsa sugjeroi ngritjen e një grupi pune për rishikimin e akteve ligjore dhe nën ligjore që rregullojnë marrëdhëniet e minibashkive me Bashkinë e Tiranës./tvklan.al
