Vetëm 17% e subjekteve kanë marrë pagesat
Viti 2020 ka shënuar ecurinë më të ulët të shpërndarjes së fondeve për kompensimin e pronarëve të shpronësuar në periudhën e komunizmit. Sipas të dhënave të Ministrisë së Financave dhe Ekonomisë, në total shteti shqiptar i ka paguar 5.4 milionë dollarë ish-pronarëve nga 45 milionë të dedikuara për ta këtë vit.
Nga 1 mijë subjekte që janë planifikuar për t’u kompensuar, vetëm 175 prej tyre kanë arritur të marrin kompensim. Shkaku kryesor është mbyllja e sporteleve të Agjencisë së Trajtimit të Pronave gjatë periudhës së pandemisë.
“Ecuria e aplikimeve është e ulët për shkak të situatës së krijuar nga pandemia Covid-19 janë mbyllur të gjitha sportelet për shërbime dhe funksionojnë vetëm online.”
Pandemia do të ndikojë në ecurinë e kompensimit të ish-pronarëve këtë vit, ndërsa në aktin e tretë normativ të rishikimit të buxhetit qeveria ka ulur fondin e dëmshpërblimit me 5 milion dollarë.
Me miratimin e ligjit të ri për trajtimin e pronave në vitin 2015-ë, qeveria parashikonte të përfundonte procesin e kompensimit të pronave brenda 10 vjetësh, duke paguar një faturë 500 milion dollarësh total e shpërndarë në buxhet me 50 milion dollarë çdo vit, por fondi ka qenë gjithnjë më i ulët.
Tv Klan
