Prokuroria kërkon gjurmët e gishtave të Qerim Ismailit

Prokuroria kërkon gjurmët e gishtave të Qerim Ismailit

15:57 14/01/2020

Organi i akuzës nis verifikimet pas akuzave të PD

Prokuroria e Përgjithshme kërkon zyrtarisht të administrojë gjurmët e gishtave të kryebashkiakut të Mallakastrës, Qerim Ismailaj, pas denoncimeve publike të Partisë Demokratike se ai është dënuar me 3 vite burg për rrahje në Greqi.

Pas 5 ditësh, organi i akuzës do të kërkojë që Ismailaj të paraqitet në laboratorin e Kriminalistikës, për depozitimin e gjurmëve të gishtërinjve, për të bërë më pas krahasimin me përgjigjet që do të vijnë nga autoritetet greke, ku pritet të dërgohen edhe letër-porosi.

Në rast se kryebashkiaku refuzon, ai do të shoqërohet forcërisht. Po kështu, Prokuroria e Përgjithshme i është drejtuar me një shkresë zyrtare Komisionit Qendror të Zgjedhjeve, ku i kërkon t’i vërë dispozicion formularin e vetëdeklarimit të kryetarit të Bashkisë së Mallakastrës.

Sipas Partisë Demokratike, Ismaili ka fshehur në formularin e dekriminalizimit dënimin në Greqi për plagosje. Selia blu pretendon se zyrtari i lartë është dënuar në mungesë nga drejtësia greke më datë 25 Shkurt të vitit 2000.

Sipas dokumentit të bërë publik, Ismailaj rezulton i dënuar për kryerjen e veprimeve të dhunshme, por nuk e ka vuajtur dënimin, pasi sipas Partisë Demokratike, nuk është gjetur nga autoritetet greke.

Qerimaj ka mohuar akuzat e Partisë Demokratike. Në një status në rrjetin social në  Facebook ai ka publikuar pagesat që ka përfituar kur punonte si mësues në këtë periudhë.  

Tv Klan


Grupi
LAJMET
Të ngjashme
Grupi