Pas vendimit të Bashkimit Europian për të organizuar një konferencë donatorësh në Tiranë që të mblidhen ndihma për Shqipërinë, ka reaguar Kryeministri Edi Rama.
Shefi i qeverisë falenderon Presidenten e Komisionit Europian, Ursula Von der Leyen, dhe vendet anëtare të BE-së për solidaritetin e treguar.
“Mirënjohje Presidentes Von Der Leyen dhe liderëve të vendeve anëtare të BE për mesazhin e fortë të solidaritetit me Shqipërinë në këtë kohë dramatike e përcaktuese pas tragjedisë që shkaktoi tërmeti. Faleminderit edhe për vendimin e mbajtjes së Konferencës së Donatorëve në Tiranë”, shkruan Kryeministri Edi Rama në Twitter.
Në mbledhjen e Këshillit të Europës një ditë më parë, u vendos që BE të organizojë konferencë donatorësh në Tiranë në Janar 2020 që të mblidhen fonde për të përballuar pasojat e tërmetit që goditi Shqipërinë më 26 Nëntor. /tvklan.al
