Blerja e mundshme e sistemeve ushtarake ruse nga Turqia, ka nervozuar Shtetet e Bashkuara dhe ka përshkallëzuar ndjeshëm marrëdhëniet Uashington – Ankara. Paralajmërimi i fundit për Turqinë vjen nga Pentagoni që i bëri thirrje presidentit Erdoan të tërhiqet.
Charlie Summers, zëdhënës i Pentagonit:
Nëse Turqia e merr sistemin S-400, do të ketë pasoja të rënda në marrëdhëniet tona ushtarake. Nëse ata blejnë sistemet mbrojtëse ruse, atëherë nuk do të marrin avionët tanë F-35 dhe sistemin raketor “Patriots”.
Sistemi tokë-ajër Patriots, ka si funksion kryesor mbrojtjen nga raketat balistike dhe është alternativa konkurruese e S-400 ruse.
Kjo deklaratë e Pentagonit është e para e drejtpërdrejtë për Rusinë. Pak ditë më parë, edhe komandanti i ushtrisë amerikane për Europën, Curtis Scaparrotti, këshilloi Kongresin të bllokonte marrjen e avionëve F-35 nga Turqia, pasi siguria e tyre është e kompromentuar nëse blihen sistemet ruse S-400.
Por Ankaraja nuk ka ndërmend të bëjë hapa pas. Presidenti Erdogan pohoi të enjten se marrëveshja me Moskën do të mbyllet dhe se vendi i tij mund të blejë gjithashtu sistemet e avancuara ruse S-500.
Tv Klan
