Familja e Michael Schumacher ka publikuar një deklaratë ku falenderon fansat e shtatë herë kampionit të botës në Formula 1, i cili është nën kujdes mjekësor që pas aksidentit që pësoi në ski në Alpet Franceze në Dhjetor 2013. .
Menaxharja e 49-vjeçarit, Sabine Kehm, tha se familja Schumacher vlerëson ndjeshmërinë e tifozëve dhe mirëkuptimin e tyre që gjendja shëndetësore e tij të mbetet një çështje private dhe jo publike. Kehm nuk preferoi të jepte informacion sa i përket gjendjes shëndetësore aktuale të Schumacher.
“Ajo që mund të them është se familja vlerëson ndjeshmërinë e tifozëve. Njerëzit e kuptojnë se gjendja e tij shëndetësore nuk duhet të ndahet me publikun”, tha menaxherja e Schumacher.
Familja e tij ka vendosur se që prej datës 16 Qershor, një koleksion privat i Schumacher si makina dhe veshja e tij e garave të Formula 1, të ekspozohen në një aeroport të vjetër në Këln të Gjermanisë.
Michael Schumacher u dëmtua në kokë nga aksidenti në ski dhe që prej asaj kohe nuk ka qenë në gjendje të ecë apo të flasë. Ai përplasi anën e djathtë të kokës në një shkëmb dhe ra në koma. Gjendja e tij u stabilizua disa kohë më vonë pasi doli nga koma, por ende mbahet nën kujdes mjekësor në shtëpinë e tij në Gjenevë të Zvicrës. /
tvklan.al
