Gjurmët e gishtave të Aleksandër Lucës janë gjetur në hekurin me të cilin goditi studenten 21-vjeçare Eleni Tofaloudi. Televizioni grek “Skai” raporton se shenjat e gishtave të shqiptarit janë zbuluar nga raporti i mjekësisë ligjore të policisë.
Raporti tregon se 20-vjeçari shqiptar ka mbajtur në dorë hekurin me të cilin qëlloi në kokë studenten duke i shkaktuar lëndime të rënda në kokë, aq sa 21-vjeçares i ishte prerë veshi i majtë. Krimi është kryer në bashkëpunim me 21-vjeçarin grek Manolis Koukouras. Pasi e dhunuan, dy të rinjtë e hodhën studenten në det me këmbë të lidhura. Ekspertiza tregoi se vajza vdiq si pasojë e mbytjes, që do të thotë se ajo mund të ishte gjallë nëse do të ishte dërguar në spital, edhe pse kishte lëndime të rënda në kokë.
Ndërkohë, Aleksandër Luca është dërguar në burgun e Grevenas, aty ku ndodhet edhe bashkëpunëtori i tij Manolis Koukouras. Dy ditë më parë, 20-vjeçari shqiptar u dhunua në qelinë e tij nga të burgosur të tjerë. Ai pretendonte se ishte përdhunuar, por raporti mjekësor nuk e vërtetoi një gjë të tillë. Autoritetet greke kanë nisur gjithashtu hetimet për dhunën e ushtruar në burg ndaj shqiptarit Aleksandër Luca. Studentja Eleni Tofaloudi u vra më 27 Nëntor në ishullin Rodos të Greqisë, ndërsa trupi i saj u gjet një ditë më vonë.
/tvklan.al
