Vaksina ruse, efekte të lehta anësore tek 14% e të testuarve
India është shndërruar në vatrën më të nxehtë globale të COVID-19. Ritmet e infektimit në këtë vend janë më të lartat në botë. Edhe këtë të mërkurë u shënuan mbi 90 mijë infektime ditore, duke ruajtur nivelin e ditëve të fundit.
Të prekurit në këtë vend arritën një shifër të re kulmore prej mbi 5 milionë, me një vdekshmëri prej 1.6%.
Shifër kulmore shënuan edhe Shtetet e Bashkuara ku numri i viktimave arriti në mbi 200 mijë që prej nisjes së pandemisë, me e larta në gjithë globin. Vdekshmëria në këtë vend ndodhet në nivelin 2.9%.
Presidenti amerikan Donald Trump shprehu sërish optimizmin se vaksina do të jetë gati brenda pak javësh, duke hedhur poshtë skepticizmin e shprehur më herët nga ekspertët e shëndetit në Shtetet e Bashkuara.
Ministria e Jashtme ruse njoftoi se vaksina Sputnik V, që pretendohet të jetë e para kundër COVID-19, ka dhënë efekte anësore tek 14% e personave që janë bërë pjesë e testimeve. Autoritetet ruse thanë se simptomat janë dhimbje muskujsh dhe temperaturë e lehtë, çka sipas tyre nuk përbën problem. Rusia do të bëjë edhe shitjen e parë prej 100 milionë dozash të kësaj vaksine tek një firmë indiane.
Tv Klan
