Kosova në zi për viktimat e aksidentit


Kosova në zi për viktimat e aksidentit

15:45 26/07/2021

Shumica e të plagosurve të aksidentit në Kroaci do të dalin nga spitali

Disa të lënduar nga aksidenti që ndodhi të dielën në Kroaci do të vijnë në Kosovë e disa të tjerë do të kthehen për trajtim në Gjermani, ndërsa të lënduarit që janë më rëndë do të vazhdojnë të qëndrojnë në Kroaci.

Këtë e ka bërë të ditur ministri i Punëve të Brendshme Xhelal Sfeqla i cili po qëndron atje bashkë me ministrin e Shëndetësisë Arben Vitia.

Ai nuk saktësoi se kur trupat e 10 viktimave të aksidentit do të kthehen në Kosovë duke thënë se kjo varet nga procedurat zyrtare që duhet të kryhen në Kroaci. Ndërsa familjarët e viktimave kanë nisur të presin mysafir për ngushëllime këtu në Kosovë.

Shoferi i dyshuar për shkaktimin e aksidentit tragjik është intervistuar në Prokurori.

Të gjithë flamujt janë ulur në gjysmë shtizë, pasi Presidentja e ka shpallur ditë zie ditën e hënë.

Ndërsa komuna e Prishtinës ka anuluar për ditën e hënë të gjitha aktivitetet sportive e kulturore.

Në nderim të viktimave, me kërkesë të kryetarit të Kuvendit Glauk Konjufca, është shtyrë  për një ditë më vonë edhe mbledhja e Kryesisë së Kuvendit e paraparë që të mbahet të hënën.

Presidentja Vjosa Osmani ka ndërprerë vizitën e saj në Japoni, dhe do të kthehet në Kosovë.

Ndërsa gjatë orëve të mbrëmjes të dielën edhe Kryeministri i vendit Albin Kurti së bashku me disa prej ministra kanë qëndruar në Kroaci ku dhe kanë vizituar të lënduarit e aksidentit.

Të dielën 10 vetë me prejardhje nga Kosova humbën jetën dhe mbi dyzet u plagosën kur autobusi me të cilin udhëtonin, doli nga rruga në qytetin kroat, Sllavonski Brod.

Autobusi me 67 udhëtarë përfshirë fëmijë, ishte nisur nga Frankfurti për në Kosovë.

Tv Klan







Të ngjashme