Prokuroria dhe Policia e Shkodrës nisin hetimet
Zhdukja në rrethana misterioze e shefit të policisë së anti-drogës për zonën e Ulqinit dhe Tivarit në Malin e Zi, Rudolf Elezoviç vë në lëvizje edhe autoritetet shqiptare. Policia dhe prokuroria e Shkodrës kanë hapur hetimet pas kontakteve me homologët malazezë se 54-vjeçari u kishte thënë familjarëve se po udhëtonte drejt Shqipërisë.
“Më tha se do të shkonte deri në Shkodër dhe do të kthehej shpejt”, ka rrëfyer bashkëshortja e tij përpara hetuesve. Kontakti i tij i fundit është lokalizuar më 27 maj pranë kufirit në zonën mes fshatrave Pentar dhe Reç.
Më pas telefoni i tij ka qenë i fikur. Policia shqiptare ka nisur kërkimet në këtë zonë pas dyshimeve se mund të kemi të bëjmë me një ngjarje aksidentale. Besohet se ai po udhëtonte me një mjet ujor nëpërmjet Bunës pasi në pikën e kalimit kufitar të Muriqanit emri i Elezoviç nuk figuron në sistemin TIMS.
Nuk përjashtohet as pista e një ngjarjeje kriminale ndaj hetuesit janë duke kërkuar personat që kanë pasur kontakte të ngushta me Elezoviç. Ata që janë pyetur të parët kanë qenë familjarët dhe kolegët. Sipas asaj që shkruajnë mediat malazeze, 54-vjeçari kishte kryer udhëtime të shumta kohët e fundit drejt Shkodrës.
Elezoviç ka mbajtur për 6 vjet detyrën e shefit të policisë së Ulqinit derisa u zëvendësua në 2014-ën. Prej asaj kohe ai është angazhuar në policinë kufitare malazeze me detyrën e Shefit të departamentit kundër trafiqeve të paligjshme.
Tv Klan
