Lazdrim Latifi denoncon në “Stop” manipulimin e provave të aksidentit të ndodhur në Nëntor 2016 në rrugën “Komuna e Parisit”, si pasojë e të cilit ai humbi një këmbë. Ishte ora 23:00 e mbrëmjes dhe Lazdrimi ishte në rrugën kryesore pranë Qendrës Kristal, kur i preu rrugën një makinë, që vinte nga rruga dytësore për të hyrë në kryqëzim.

“Stop” ka siguruar pamjet e kamerave të bizneseve aty pranë që tregojnë rrethanat e ngjarjes.

Nëse drejtuesja e automjetit tip “Nissan Micra” do të kishte kontrolluar rrugën para se të futej në rrugën kryesore, ky aksident nuk do të kishte ndodhur. Nga pamja duket se drejtuesja e mjetit nuk frenon fare, ndërsa Latifi ka frenuar, por pa shmangur dot përplasjen.

Një tjetër faktor kryesor që solli aksidentin ka qenë edhe mungesa e sinjalistikës horizontale dhe vertikale në rrugën dytësore, andej nga vinte makina.

Eksperti rrugor, Fatmir Hasho tregon problemet që ka ky kryqëzim në sinjalistikë. Ai shpjegon se përparësi në këtë kryqëzim kanë mjetet që janë në rrugën kryesore.

“Me sinjalistikën që kemi sot, në fakt përparësia është e rrugës kryesore që vjen nga qendra tregtare, sepse në të dy krahët e rrugës janë vendosur tabelat stop, që na detyrojnë që ne të ndalojmë. Natyrisht mungon sinjalistika horizontale, vija e ndalimit, e cila duhet të shoqërohet me tabelën stop. Çdo mjet para tabelës stop duhet të ndalojë në mënyrë të rreptë të katër gomat dhe minimalisht kjo kohë duhet të jetë 3 sekonda.”

Prokurori Ylli Pjetërnika fillimisht arrestoi dy ekspertët për falsifikim të provave të aksidentit, por në fund pushoi çështjen, pavarësisht se provat ishin të shumta e të pakundërshtueshme.

Lazdrim Latifi: Iu drejtova Prokurorisë, arrestoi disa persona, policin rrugor dhe ekspertin rrugor për shkak se bënë një ekspertizë të rreme, ku mua më nxirrnin në një rrugë tjetër, paralele, Aksidentin e ndiqte prokurori Ylli Pjetërnika, me të cilin kam biseduar në telefon në Dhjetor kur kam qenë në Itali. Në Janar më kërkoi që të kthehesha nga Italia. Jam kthyer apostafat. Ai ka parë videot që u sekuestruan më pas nga ai, por mori videot dhe në bazë të tyre arrestoi këto dy personat. Gjykata vendosi të bëjë një ekspertizë të re dhe të thërrasë 3 ekspertë të tjerë, të cilët vendosën as mish, as peshk. Këto persona rifalsifikuan prapë dhe njëri më bën fajtor mua. Prokurori vendosi të mbyllë procesin gjyqësor, më nxori mua fajtor dhe kërkoi 10 ditë burg, ky gjykatësi tha ore ti, kot ia fute se nuk ka faj, ka një patentë të Klasit B, që di qarkullimin rrugor. Thonin se s’ke leje drejtimi, kur unë me atë motor kam lëvizur edhe jashtë shteti dhe kam kaluar kufirin.

Por çuditërisht, çështja u pushua, duke mos vendosur se kush ishte shkaku kryesor i këtij aksidenti që la pa këmbën e majtë Latifin.

“Këtë vendim e ankimova, u mbajtën disa seanca, në një seancë kërkova provat e reja, dua dëshmitarët që nuk janë. Prokurori, i cili e akuzova si të korruptuar, kur i them se me policin kam diskutuar për ngjarjen dhe më ka kanosur në telefon, kur i ati i gocës në telefon avokatit tim i ofronte lekë që ta mbyllin situatën… këto nuk u morën parasysh. Ndërsa 10-ditëshin e burgut ma la me kusht.”

Pas shumë përpjekjesh nga ana e Lazdrim Latifit, çështja u rihap në Prokurorinë e Tiranës nën drejtimin e prokurorit Fatmir Hoxha, por edhe këtë herë përfundimi ishte mosfillim i çështjes, duke falsifikuar deklaratën e të dëmtuarit dhe firmën e tij.

“Zotëria me mbiemrin Hoxha nuk më ka thirrur ndonjëherë mua në prokurori për të më marrë në pyetje. Kur ai ka shkruajtur se me datë 23 më ka marrë në pyetje, unë kam qenë në Itali.”

“Kam qëndruar një muaj e gjysmë në spital për këtë këmbë dhe dy herë që është ndërruar kjo, janë shpenzuar 28 mijë euro. Plus një këmbë tjetër që kushton 7 500 euro dhe një tjetër po ashtu. Pse? Se unë me këtë duhet të ec. Duhet të kem një rezerve dhe një për kur bëj dush. Se përndryshe me paterica, duhet të ndryshoj gjithçka, edhe shtëpinë. Gjithë jeta ime, puna që bëja përpara nuk mund ta bëj më? Ku është gjykata? Ata bënë fajtor entin rrugor, në njërën anë jam në Gjykatën e Apelit për dëmshpërblimin, por jam edhe në Gjykatën Penale me Entin Rrugor.”

Sot i gjithë procesi është në Gjykatën Administrative dhe gjyqtari Arben Ahmetaj e ndau fajin 70 me 30 mes entit të rrugëve dhe drejtueses së automjetit, duke pasur parasysh se ligji thotë që shkaktari determinant me 100 të fajit dëmshpërblen të dëmtuarin.

“Unë në 4 vite kam 50 mijë euro dëme. Ku do t’i gjej? Edhe sikur të isha pasaniku më i madh në Shqipëri ato shpenzime nuk do t’i bëja dot nga xhepi. Këto janë lekët që unë kërkoj, unë nuk po kërkoj lëmoshë. Unë kërkoj lekët e dëmit tim. Unë kërkoj të drejtën time. Por ku është e drejta, kush e cakton të drejtën, i padrejti?” /tvklan.al