Reshjet e dendura të shiut kanë sjellë përmbytje në Qarkun Shkodër. Sipas raportit për ditën e sotme, sipërfaqja totale e përmbytur në këtë qark është 1100 hektarë, situatë kjo e pandryshuar që nga ora 18:00 e datës së djeshme (19 Janar).
1100 hektarët e përmbytur i përkasin Njësisë Administrative Ana e Malit.
Niveli i lumit Drin (hidrometri ura e Bahçallëkut) shënon kuotën 6.15 me një rënie prej 40 centimetrash me orën 18:00 të datës 19.01.2023 (kuota maksimale 7.50 metra).
Niveli i liqenit (hidrometri ura e Bunës) shënon 8.10 metra me një rritje prej 5 centimetrash me orën 18:00 të datës 19.01.2023 (kuota maksimale 8.70 metra).
Rruga e Obotit ka prezencë uji 55 centimetra, e pandryshuar me orën 18:00 e datës 19.01.2023. Në rrugën e Obotit po operon një mjet i kalueshmërisë së lartë së bashku me 4 forca të ushtrisë. Ndërkohë ujësjellësi Oblika 1 është jashtë funksionit.
Në Bashkinë Vau Dejës vazhdon të ketë reshje shiut me intensitet të lartë. Për pasojë, Njësia Administrative Vig Mnelë ëhtë pa energji elektrike pasi 7 shtylla të tensionit të lartë i ka marrë uji. Gjithashtu nuk ka energji elektrike në Njësinë Temal dhe Shllak. Ka rrugë rurale të bllokuara nga rëshqitje gurësh dhe dherash. Argjinatura në krahun e majtë të urës Gjinajve në Njësinë Administrative Vig Mnelë është drejt shembjes.
Ndërkohë, reshjet e dëborës kanë përfshirë zonat malore. Akset rrugore në rrethin e Pukës nuk kanë probleme, në Qafë-Mali ka prezencë të borës me trashësi rreth 5 centimetra pa shkaktuar probleme për qarkullimin e mjeteve. Aksi Koplik-Qafë-Thore-Theth i kalueshëm me zinxhirë./tvklan.al
