Opozita kërkon dorëheqjen e ministres Koçiu (Të gjitha zhvillimet në Kuvend)

Ministrja Albana Koçiu ishte thirrur në një interpelancë për të folur për projektligjin për “Shëndetin seksual dhe riprodhues”. Ky projektligj ka ngjallur shumë debate që kur është hedhur për konsultim. Por cili është drafti që ka krijuar kaq debat?

Drafti synon të rregullojë zhvillimet e reja në fushën e shëndetit seksual dhe riprodhues, duke përfshirë edhe shtatzëninë surrogate dhe riprodhimin in vitro. Nëse drafti i propozuar do të miratohet atëherë çdo grua e cila e ka të pamundur për shkaqe shëndetësore të mbetet shtatzënë ka të drejtën që të ketë një fëmijë përmes një marrëveshje me shkrim me një grua tjetër, e cila duhet të jetë mbi 25 vjeç e të ketë lindur më parë të paktën një fëmijë tjetër.

Gjithashtu projektligji qartëson edhe kushtet e abortit në Shqipëri, të papërcaktuara qartë në ligjin në fuqi, të miratuar në vitin 2002 “Për shëndetin riprodhues”.

Ligji njeh të drejtën për ndërprerje vullnetare të shtatzënisë në një institucion shëndetësor të akredituar publik ose privat dhe mund të kryhet brenda katërmbëdhjetë javëve të para të shtatzënisë, ndërsa aktualisht është 12 javë.

Projektligji i hap rrugë lejimit të abortit edhe tek të miturat e grupmoshës 16 vjeç. Sipas nenit 12 të kësaj nisme, për ndërprerjen e shtatzënisë, adoleshentet mund të abortojnë edhe pa djeninë e prindërve.

Për të lexuar lajmin e plotë kliko KËTU!

Përfundon interpelanca e deputetit Tritan Shehu me ministren Albana Koçiu. Kuvendi vijon me çështjet e tjera në rendin e ditës.

Sot është parashikuar të raportojnë disa institucione si Autoriteti i Komunikimeve Elektronike dhe Postare, Agjencia e Sigurimit të Depozitave, gjendja e sektorit të energjisë dhe veprimtaria e ERE etj.

Po ashtu pritet të diskutohet për disa projektligje të ndryshme.

Interpelanca mes ministres Koçiu dhe deputetit Shehu vazhdoi. Kësaj here u ndalën tek projektligji  “Për shëndetin seksual dhe riprodhues”.

Replikat mes ministres dhe deputetit i gjeni në videon më poshtë!

Edhe pse temë e interpelancës së opozitës me ministren e Shëndetësisë Albana Koçiu ishte projektligji “Për shëndetin seksual dhe riprodhues”, mbizotëruan debatet për skandalin te “Onkologjiku”.

Deputeti i PD Tritan Shehu iu drejtua Koçiut, duke thënë se ajo duhet t’u kërkonte ndjesë të thellë shqiptarëve për abuzimin e madh të mjekëve me pacientët e sëmurë.

“E vetmja gjë që duhet të bënit ishte t’i kërkonit ndjesë publikut shqiptar për bëmat e dy ditëve më parë.  T’u kërkonit falje të thellë shqiptarëve për këtë katandisje të sistemit shëndetësor në Shqipëri. Në fjalën tuaj nuk ishit e qartë, ju bëtë lojëra fjalësh, iu shmangët çdo pyetjeje direkte…”, tha Shehu në Kuvend.

Teksa opozita ka kërkuar dorëheqjen e saj, ministrja e Shëndetësisë Albana Koçiu ka folur nga foltorja e Kuvendit për skandalin në spitalin Onkologjik.

Ajo ritheksoi se ‘bluzat e bardha’ që janë akuzuar për abuzim në ushtrimin e detyrës do marrin përpos ndëshkimit ligjor, edhe atë moral e administrativ.

“Për të sanksionuar me ligjn të gjithë ata mjekë, ata që nuk mund t’i quaj më as profesionistë, që e  trajtojnë jetën njerëzore si mall në tregun e shumicës do  kërkojmë ndryushime në ligj, do u hiqet e drejta e ushtrimit të detyrë në rast se bëjnë sjellje amorale. Kam lexuar qëndrime nga ato kritiket….”

Për të lexuar lajmin e plotë kliko KËTU!

Opozita ka kërkuar dorëheqjen e Ministres së Shëndetësisë, Albana Koçiu.

Deputetët demokratë kanë goditur tavolinat dhe kanë bërë zhurmë teksa ministrja Koçiu përgjigjej në interpelancë deputetit Tritan Shehu.

Reagimi i deputetëve demokratë vjen pas skandalit tek Spitali Onkologjik.

Për të lexuar lajmin e plotë kliko KËTU!

Ministrja Albana Koçiu i përgjigjet pyetjeve të deputetit Tritan Shehu në lidhje me interpelancën e kërkuar nga demokrati.

Më poshtë mund të ndiqni në video të gjitha replikat që ndodhën për çështjen e kërkesave për informacion nga opozita.

E menjëhershme ishte dhe replika e zv/kryeministres Belinda Balluku. Ajo u shpreh se opozita merr përgjigje, por problemi është që nuk marrin ato përgjigje që ata duan.

“Ju merrni përgjigje nga ne, por keni problem se doni përgjigjen që doni ju. Ju merrni përgjigje, i keni marrë të gjitha përgjigjet për shtëpitë e shembura në Unazën e Re, nga Ministria e Shëndetësisë dhe të gjitha ministritë e tjera. Ju doni të merrni përgjigje ashtu siç e keni në mendje për të vazhduar baltën në publik”, tha ajo.

Debatin në lidhje me dhënien e informacionit nga ministrat e vazhdoi deputetja demokrate Albana Vokshi. Kjo e fundit akuzoi zv/kryeministren se vetë ajo nuk ka dërguar informacione.

“Ajo vetë nuk ka kthyer informacione në lidhje me një interpelancë për shembjet e shtëpive tek njësia 11. I kam dërguar disa shkresa. Meqenëse ajo nuk është përgjigjur ia kam drejtuar Komisionerit për të Drejtën e Informimit. Doni shembuj tjetër? Erion Veliaj nuk kthen përgjigje për asnjë informacion. Doni shembuj të tjerë? Ministria e Shëndetësisë, ose kthen përgjigje ose bën sikur kthen përgjigje”, tha Vokshi.

Për t’i kthyer përgjigje Bardhit ishte zv/kryeministja Belinda Balluku.

“Zoti Bardhi, vetëm për pjesën e informacionit të munguar nga qeveria. Nuk besoj se ministrat nuk dërgojnë informacione. E kemi detyrim ligjor dhe të gjithë ministrat përgjigjen. Nëse keni fakte konkrete se kush nuk është përgjigjur mu drejtoni mua. Më duket e habitshme sepse në dijeninë time nuk ka asnjë ministër që nuk u përgjigjet. Më dërgoni një listë të kërkesave pa përgjigje të të gjithë deputetëve dhe do ta ndjekë zyra ime për të dhënë përgjigjet e duhura”, u shpreh ajo.

Më pas, Gazment Bardhi vijoi me akuzat ndaj qeverisë për mungesë informacionesh nga qeveria më saktësisht nga ministri i Financave, Ervin Mete.

“Nuk e di kush është ministër i Financave. Në seancë plenare një nga ministrat më të rëndësishëm nuk vjen asnjëherë. I kërkojmë informacion, nuk kthen përgjigje”, tha Bardhi.

Pasi mazhoranca refuzoi interpelancën me kryeministrin Edi Rama, kreu i grupit parlamentar të PD akuzoi kryeparlamentaren Lindita Nikolla se nuk zbaton Kushtetutën.

“Jeni totalisht në shpërdorim detyre duke refuzuar zbatimin e kushtetutës dhe rregullores. Ju lutem hiqni dorë nga sjellja mohuese nga të drejtat e opozitës. Për pasojat do mbani përgjegjësi vetëm ju zonja kryetare dhe askush tjetër. Nuk mund të talleni me të drejtat tona”, tha Bardhi.

Kryeparlamentarja u përgjigj se është në respektim të Kushtetutës dhe rregullores.

“Jam vetëm në respekt të kushtetutës dhe rregullores. Përjashtimet që bën rregullorja e Kuvendit nuk mund t’ju lejoj që t’i ktheni në rregullore. Vijojmë me seancën”, tha ajo.

Kuvendi nisi me 1 minutë heshtje në përkujtim të ditës së genocidit ndaj shqiptarëve të Çamërisë.

Në lidhje me këtë çështje foli kreu i PDIU-së, Shpëtim Idrizi. Ai tha se masakra ndaj të parëve nuk falet e as nuk harrohet.

“Jam këtu për ta sqaruar dhe për ta thënë më me forcë sepse masakra ndaj të parëve tanë ne nuk i falim, nuk i harrojmë, por i nderojmë sot dhe në çdo ditë të qenies sonë”, tha ai.

Për të lexuar lajmin e plotë kliko KËTU!

Zhvillohet këtë të enjte seanca e radhës parlamentare.

Deputetët e PD-së kërkuan dorëheqjen e ministres së Shëndetësisë Albana Koçiu. Reagimi erdhi pas skandalit tek Onkologjiku.

Ministrja Koçiu u shpreh se mjekët në fjalë do të mbajnë peshën e ligjit dhe moralin e turpit.

Kuvendi nisi me debate dhe shkak u bë refuzimi për interpelancë me kryeministrin Edi Rama. Opozita akuzoi kryeparlamentaren Lindita Nikolla se nuk zbaton rregulloren.

Më pas debatet opozitë-mazhorancë u zhvilluan në lidhje me kërkesat për informacion që sipas PD nga qeveria nuk kthehet përgjigje pas kërkesave për informacion. Kjo u mohua nga zv/kryeministrja Belinda Balluku.

REDAKSIA TVKLAN.AL