Vitin e ardhshëm zona turistike e Gjirit të Lalëzit do të furnizohet me energji nga një nënstacion tërësisht i ri. Investimi me vlerë 4.5 milion dollarësh do të rritë cilësinë e shërbimit e do t’i japë fund defekteve në rrjetin e shpërndarjes së energjisë. Gjatë një inspektimi, ministri Damian Gjiknuri tha se deri tani është kryer thuajse gjysma e punimeve, e se prioritet i qeverisë është zgjidhja e problemeve në zona me përparësi turizmin.
“
Investimet në këtë fazë do të fokusohen në dy drejtime: Një, duke i paraprirë zhvillimeve të mundshme apo duke investuar në ato zona që kanë potencial të madh të rritjes ekonomike, siç janë zonat me përparësi turizmi
”, tha Damian Gjiknuri, ministër i Infrastrukturës dhe Energjisë.
Pas përfundimit të nënstacionit, do të fillojë rinovimi të gjithë rrjetit energjitik të zonës në të cilin nuk është investuar prej më shumë se 50 vjetësh.
“
Është një zonë e cila është që nga koha e elektrifikimit e paprekur, e painvestuar përsa i përket energjisë elektrike. Ka nisur fazën e parë që është realizimi i këtij nënstacioni dhe do të pasohet me fazën e dytë në fund të vitit, me zhvillimin e rrjetit 20 kilovolt që është një investim tjetër rreth 1 miliardë lekë të reja
”, tha Ardian Çela, administrator i OSHEE-së.
Paralelisht me këtë investim edhe Operatori i Sistemit të Transmetimit po ndërton linjën 110 kV Sallmone-Gjiri i Lalëzit.
Tv Klan
