Ministrit italian i Drejtësisë, Andrea Orlando, falenderon autoritetet shqiptare për përgjigjen e menjëhershme të kërkesës së palës italiane për ekstradimin e Nazer Seitit.
“Falenderoj autoritetet shqiptare të cilat ju përgjigjen menjëherë kërkesës për ekstradim të shtetasit shqiptar Seiti Nazer, i kërkuar nga autoritetet gjyqësore italiane në kuadër të një hetimi të rëndësishëm ndaj një organizate kriminale që vepronte në fushën e narkotrafikut, në linjat italo-shqiptare”.
Sipas Orlandos, dorëzimi i tij është në koherencë me angazhimet ndërkombëtare që janë detyruese për autoritetet italiane dhe shqiptare, sipas Konventës europiane të ekstradimit të 13.12.1957 dhe Marrëveshjes dypalëshe të firmosur në Tiranë me 3.12.2007.
Më tej në reagimin e tij, Ministri italian thotë se
“kryerja e dorëzimit, i mundëson autoriteteve italiane ushtrimin e plotë të hetimit dhe të jurisdiksionit mbi faktet e rënda që përbëjnë objektin e hetimit të Prokurorisë së Catania-s, pa paragjykuar zhvillimet e procedimit që paralelisht po kryhet nga pala shqiptare, e cila madje mund të përfitojë nga bashkëpunimi i autoriteteve italiane, në bazë të konventave për ndihmën gjyqësore, që janë në fuqi mes dy vendeve tona”.
/tvklan.al
