Sllovenia është bërë vendi i parë anëtar i NATO-s që ka emëruar një grua në krye të ushtrisë. 55-vjeçarja Ermenc është përzgjedhur bazuar në eksperiencën dhe kontributin e saj për krijimin e një ushtrie profesioniste.
Është një rekord i rëndësishëm për ushtrinë e vogël sllovene, që sot në drejtim të saj do të jetë një grua. Alenka Ermenc, 55 vjeç, e emëruar Komandante e Përgjithshme e Forcave të Armatosura është e vetmja që ka një post kaq të lartë në 29 vendet anëtare të NATO-s. Ajo u zgjodh në bazë të eksepriencës si komandante e një njësie të ushtrisë sllovene, për kontributin e saj në krijimin e një ushtrie profesionale dhe për formimin e saj civil dhe ushtarak.
Ashtu si ndodh shpesh, emërimi i një gruaje vjen në një moment krize dhe në fakt Presidenti i Sllovenisë Borut Pahor, u shpreh se pret që Ermenc të përmirësojë situatën e forcave të armatosura kombëtare. Në Shkurt, kreu i ushtrisë i atëhershëm Andrej Osterman u shkarkua nga ky post, pasi një batalion elitar prej 800 ushtarësh dështoi në katër prova nga pesë, në testimet mbi aftësitë luftarake të NATO-s. E diplomuar në shkenca sociale, kreu i ri i ushtrisë hyri në shërbimin ushtarak në vitin 1991, duke marrë pjesë në mënyrë aktive në luftën dhjetë ditore të shpërthyer pas shpalljes së pavarësisë nga ish-Jugosllavia, e cila u fitua nga Sllovenia, pavarësisht superioritetit të ushtrisë popullore jugosllave.
Në vitin 2008 ajo u diplomua në Kolegjin Mbretëror të studimeve për Mbrojtjen në Londër dhe në 2009-n mori masterin në studime ndërkombëtare. Që atëherë ajo ngjiti shkallët e karrierës ushtarake si dhe mori pjesë në misionin paqeruajtës të NATO-s në Kosovë me KFOR. Vetë ajo u shpreh për mediat sllovene se në rrugën e vështirë të karrierës ushtarake është mbështetur tek dashuria për atdheun.
/abcnews.al
