Nga sot, Shqipëria nis zyrtarisht mandatin e saj 2-vjeçar në Këshillin e Sigurimit. Në një mesazh drejtuar qytetarëve shqiptarë ditën e parë të vitit të ri, ministrja e Jashtme, Olta Xhaçka tha se Shqipëria do të kontribuojë në adresimin e çështjeve më të nxehta të sigurisë në botë. Ajo u shpreh se vendi ynë do ta përdorë këtë mundësi për të avancuar çështjen e Kosovës.
“Kosova ka qenë, është e do të jetë një kauzë e shenjtë për Shqipërinë”, tha Xhaçka në videomesazhin e saj, kur ndër të tjera u uron qytetarëve shqiptarë Vitin e Ri 2022.
Vendi ynë nuk ka qenë kurrë më parë pjesë e këtij këshilli ndërsa votimi për përfshirjen në organizmin e lartë të Kombeve të Bashkuara u votua në unanimitet të plotë nga anëtarët e kësaj organizate që në muajin Qershor.
Këshilli i Sigurimit ka 10 vende për anëtarët e përkohshëm, por dominohet nga pesë anëtarët e tij të përhershëm si Rusia, Kina, SHBA, Britania dhe Franca, të cilët kanë edhe të drejtën e vetos.
Shqipëria nis mandatin në KS, ambasada e SHBA: Urime, arritje e jashtëzakonshme!
Ambasada amerikane në Tiranë ka uruar Shqipërinë për nisjen e mandatit të saj në Këshillin e Sigurimit. Në një postim në Twitter thuhet se SHBA-ja mirëpret faktin që të trajtojë së bashku me Shqipërinë në KS sfidat më të ngutshme me të cilat përballet sot bota.
“Urime Shqipërisë për një arritje të jashtëzakonshme, fillimin e anëtarësimit të saj në Këshillin e Sigurimit të OKB-së, për herë të parë në histori. SHBA-të mirëpresin të shërbejnë së bashku me Shqipërinë në KS të OKB-së, për të trajtuar sfidat më të ngutshme me të cilat përballet sot bota jonë”, thuhet në reagimin e ambasadës./tvklan.al
