Ngelin të gjithë shoferët që futen në ritestim




Ngelin të gjithë shoferët që futen në ritestim

15:54 23/06/2022

Mungesë të theksuar të njohurive teorike

Të gjithë shoferët që për shkelje të ndryshme kanë humbur të gjitha pikët nga leja e drejtimit do të duhet ta bëjnë kursin e patentës nga e para dhe të japin sërish provimet në teori dhe praktikë.

Këtë të enjte Drejtoria e Përgjithshme e Shërbimit dhe Transportit Rrugor ka marrë në testim kontigjentin e parë të shoferëve problematik.

Dhe rezultati i këtij testimi ka qenë vërtetë shqetësues. Nga 6 drejtues mjetesh që janë ritestuar, në teori kanë ngelur të gjithë, çka i ridërgon ata nga e para në autoshkollë për t’u ripërgatitur dhe për t’u riparaqitur për testim brenda një afati 30-ditor.

Drejtoria e Transportit Rrugor thotë se humbësit e të gjitha pikëve të lejes së drejtimit të cilët i nënshtrohen ritestimit përfshijnë rastet më të rënda të shkeljeve të rregullave të qarkullimit rrugor si: përdorimi i alkoolit ose i lëndëve narkotike gjatë drejtimit të mjetit, kalimi i semaforit me të kuqe, thyerje e normave të shpejtësisë, parakalime të gabuara e të rrezikshme që kërcënojnë jetën e përdoruesve të rrugës.

Ndaj autoritetet i bëjnë thirrje të gjithë drejtuesve të mjeteve të respektojnë normat e qarkullimit rrugor sepse nëse do të humbin të gjitha pikët, do të rikthehen në autoshkollë dhe do ta rifitojnë patentën vetëm nëse nuk kanë mbi 3 gabime në pyetësorin me 30 fjali, si edhe nëse kalohet testi i praktikës!

Tv Klan













Të ngjashme