Masakër mbi myslimanët në Zelandën e Re, 49 të vrarë – TV KLAN

Masakër mbi myslimanët në Zelandën e Re, 49 të vrarë

Këto janë momentet tragjike kur një person i armatosur hap zjarr ndaj besimtarëve të një xhamie në Zelandën e Re.

Janë pamjet e një prej akteve më të rënda terroriste në histori me motive raciste, të ndodhura në dy xhami të Christchurch, me një bilanc tepër të rëndë 49 të vrarë e 48 të plagosur, të gjithë besimtarë myslimanë që kryenin ritualin e faljes.

Si autor i masakrës është identifikuar një 28-vjeçar, që në profilin e Facebook-ut ku e transmetonte drejtpërdrejtë ngjarjen e xhiruar me kamerën e trupit mbante emrin Brenton Tarrantit. Në pamje publikoi edhe fytyrën e tij.

Policia e arrestoi teksa përpiqej të largohej nga xhamia Masid Al Nur.

“Kur nisën të shtënat njerëzit nisën të dilnin jashtë me vrap. Një person i armatosur hyri brenda dhe nisi të qëllonte pa mëshirë drejt njerëzve”, tha një dëshmitar.

Në xhaminë e parë Brendon vrau 41 besimtarë nga 300 që faleshin në atë moment. 8 të tjerë i vrau 4 orë më vonë në xhaminë Masxhid. Policia arrestoi 3 të dyshuar të tjerë si bashkëpunëtorë të tij, mes të cilëve një grua dhe një shtetas australian.

“Mbante helmetë, syze, veshje ushtarake dhe qëllonte me mitraloz”, tregon një tjetër dëshmitar.

Dy masakrat ndodhën në një hark kohor prej rreth 4 orësh. Policia zbuloi dhe çaktivizoi bomba të vendosura në automjetet e të dyshuarve. Bëhet fjalë për një sulm të mirëplanifikuar, sipas Kryeministres së Zelandës së Re.

“Dënoj në mënyrën më të fortë ideologjinë e njerëzve që e bënë këtë. Zelanda e Re nuk duhet të gjunjëzohet nga këto sulme”,  tha ajo.

Mediat shkruajnë se autorët ishin pjesë e një organizate të ekstremit të djathtë dhe pak ditë më parë kishte publikuar manifestin e tij me 28 faqe, ku shprehte urrejtjen kundër emigrantëve nga vendet myslimane. Mes armëve të sekuestruara në masakër është edhe ky automatik, që mban mbishkrimin Skanderbeg.

Tv Klan

Kategori
BotaLajmet KryesoreTë gjithaVideo
0 Komente

Përgjigju

*

*