“Air Albania” gati për sfidat europiane




“Air Albania” gati për sfidat europiane

19:17 28/06/2022

Impianti në kryeqytet dhe “Elbasan Arena” janë në gjendje optimale, ndërsa në Korrik do të luajnë Tirana, Partizani dhe Laçi

Stadiumet shqiptare “Air Albania” dhe “Elbasan Arena” janë në përgatitjet e fundit për të pritur tri ndeshjet e klubeve shqiptare në Kupat e Europës në muajin Korrik.

Në kryeqytet më 12 Korrik do të luhet sfida e kthimit që Tirana do të zhvillojë ndaj Dudelanzhit, e vlefshme për turin e parë kualifikues të Ligës së Kampionëve.

Dy ditë më pas, Partizani do të ndeshet me Saburtalon në takimin e kthimit, të vlefshëm për turin e parë të Europa Conference League.

Drejtori i Departamentit të Shërbimeve dhe Administrimit të Qendrave Sportive, Kejdi Tomorri, tregon për gjendjen e dy impianteve.

 “Gjendja e stadiumit është relativisht e mirë. Jemi duke u sforcuar pak në mbajtjen e barit, duke qenë se ishte planifikuar që stadiumi të kishte këtë lloj bari deri për finalen e Conference League, por edhe pak më pas për ndeshjet e ekipit kombëtar dhe duke qenë se është një lloj bari vetëm për periudhën e dimrit, jemi duke “e vuajtur” pak për ta mbajtur në formën më të mirë të mundur për dy ndeshjet që do të vijnë me datë 12 kur do të luajë ekipi i Tiranës dhe 14 ekipi i Partizanit”, thotë Tomorri për fshf.org, ndërsa flet edhe për gjendjen e stadiumit “Elbasan Arena”, ku do të luajë ekipi tjetër që është kualifikuar në kompeticionet europiane, ekipi i Laçit.

Edhe në stadiumin “Elbasan Arena” gjendja është optimale. Prej shumë kohësh aty kemi një fushë shumë të mirë, por edhe pjesa tjetër e infrastrukturës së stadiumit është shumë mirë për të mirëpritur ndeshjen që do të luajë Laçi”, tregon Kejdi Tomorri.

Federata Shqiptare e Futbollit ka eksperiencë në pritjen e ndeshjeve të këtyre niveleve, ndërsa vepron si asistente sa i përket organizimit të sfidave.

Tomorri shton se fusha e stadiumit “Air Albania” do të rimbillet sërish, këtë herë me barin e verës e më pas vazhdohet me praktikat normale si çdo stadium tjetër.

Klan News










Të ngjashme