Gjobë 52 mln Dollarë kompanisë minerare në Kalimash

Posta

Gjobë 52 mln Dollarë kompanisë minerare në Kalimash

16:30 08/11/2019

Bashkia: Ka kryer krim mjedisor, punonte pa leje

Kompania minerare, që ushtron aktivitet në zonën e Kalimashit, është gjobitur me plot 52 milionë Dollarë nga Bashkia e Kukësit. Sipas kryebashkiakut Safet Gjici, prej vitesh kjo firmë ka punuar pa leje në zonë, madje nuk i është përmbajtur edhe kontratës me ministrinë.

“Kompania në fjalë nuk ka respektuar ligjin, nuk ka vendim për heqjen nga fondi pyjor që është e rëndësishme, punon pa leje, ka hapur disa rrugë pa leje nga bashkia. Punon në galeri dhe të gjitha pjesët e tjera të kësaj fabrike janë të paligjshme. Nuk ka respektuar atë detyrim kontraktual që e ka me ministrinë. Kjo kompani nuk ka bërë asnjë investim për zonën”, shprehet kreu i Bashkisë së Kukësit.

Gjici thotë se firma ka bërë kërdi në mjedis.

“Ne mbrojmë interesin publik, por mbi të gjitha mbrojmë dhe kërkojmë të zbatohet ligji. Pra Inspektoriati i Mjedisit ka kontrolluar me ekspertë dhe ka nxjerrë dëmë të llahtarshme. Kërdinë mjedisore që ka bërë kjo kompani nuk e ka bërë asnjë kompani tjetër në Kukës. Dhe për këtë gjë është nxjerrë dhe një gjobë”, thotë Gjici.

Firma minerare “IMI sh.p.k.” nuk do të lejohet të ushtrojë aktivitetin e saj nëse nuk paguan gjobën e vendosur nga inspektorët e Bashkisë së Kukësit.

“Nëse kompania nuk do paguajë gjobën 52 milionë Dollarë, të zbatojë ligjin që inertet të mos i hedhë në liqen. Kjo kompani nuk do të lejohet të punojë më”, thekson kreu i Bashkisë së Kukësit.

Sipas Gjicit, në kompaninë që shfrytëzon prej kohësh minierën e kromit në Kalimash janë konstatuar edhe më herët shkelje ligjore, por sërish firma ka vijuar aktivitetin e saj në kundërshtim me ligjin.

Tv Klan


Reklama
LAJMET

Të ngjashme

Reklama
UKT
UKT

Grupi