Atentat kreut të Policisë Bashkiake në Malësi të Madhe

Plagosen Mentor dhe Xhelal Hasanaj, shkak dyshohet hakmarrja

Shkodra është tronditur sërish, këtë herë nga një atentat me armë zjarri. Shefit të Policisë Bashkiake të Malësisë së Madhe Mentor Hasanaj, i është ngritur pritë, në Dobraç të Shkodrës, pranë rrethrrotullimit të “5 heronjve”. Në makinë me 39-vjeçarin Mentor Hasanaj ishte edhe babai i tij Xhelal Hasanaj 74 vjeç, i cili ka ngelur i plagosur, ndërsa bashkëshortja Vjollca Hasanaj, u ka shpëtuar plumbave.

Mentor Hasanaj është në gjendje të rëndë shëndetësore dhe është sjellë në Spitalin e Traumës në Tiranë, ndërsa Xhelal Hasanaj po merr trajtim në Spitalin e Shkodrës. Siç dallohet edhe nga pamjet, drejt makinës së Policisë Bashkiake është qëlluar disa herë. Policia e Shkodrës thotë se të paktën 5 herë u qëllua drejt makinës ku udhëtonte familja Hasanaj.

Autori ishte me motor dhe ka qëlluar në lëvizje. Paraprakisht dyshohet se shkak i atentatit mund të jetë hakmarrja, por Policia e Shkodrës po vijon hetimet, edhe për ndonjë konflikt për shkak të detyrës.

Disa orë më pas, policia gjeti motoçikletën, e cila u përdor për të kryer atentatin ndaj Drejtorit të Policisë Bashkiake. Burimet bëjnë me dije se ajo gjetur rreth 500 metra nga vendi në të cilin është kryer atentati. 3 persona janë shoqëruar, që mendohet se kanë dijeni për ngjarjen.

Tv Klan