Komisioni i Disiplinës në Federatën Shqiptare të Futbollit, ka zbuluar vendimet e marra, në lidhje me ngjarjet e ndodhura në futbollin shqiptar në javën e fundit.

Partizani, Tirana dhe Elbasani, janë dënuar me gjobë, për sjellje të gabuar të tifozëve në ndeshjet e tyre respektive.

Zyrtari i Tiranës, Grent Halili, është pezulluar me katër javë nga aktivitetet futbollistike, për sjellje josportive, ndaj zyrtarëve të ndeshjes.

VENDIMET E DISIPLINËS:

FK Partizani, për sjellje të gabuar të spektatorëve duke ndezur flakadanë dhe mjete piroteknike, në bazë të nenit 17/2/c të KDE, dënohet me gjobë në masën 50.000 (pesëdhjetë mijë) lekë.

KF Tirana, për sjellje të gabuar të spektatorëve duke hedhur sende në fushë dhe ndezje të flakadanëve, në bazë të neneve 17/2/b dhe 17/2/c të KDE, dënohet me gjobë në masën 100.000 (njëqind mijë) lekë.

Zyrtari i KF Tirana, Grent Halili, për sjellje josportive ndaj zyrtarëve, pas përfundimit të ndeshjes, në bazë të nenit 14/1/j të KDE, dënohet me 4 (katër) ndeshje pezullim nga veprimtaritë. Në zbatim të nenit 6/2/c të KDE, zyrtarit i ndalohet hyrja në të gjitha stadiumet, në veprimtaritë sportive të organizuara nga FSHF, deri në përfundim të dënimit.

AF Elbasani, për sjellje të gabuar të spektatorëve duke përdorur sharje dhe kore fyese ndaj ekipeve kundërshtare, në bazë të nenit 17/2/e të KDE, dënohet me gjobë në masën 100.000 (njëqind mijë) lekë.

Zyrtari i KF Valbona, Emiljano Gega, për protestë ndaj vendimeve të zyrtarëve të ndeshjes, në bazë të nenit 14/1/c të KDE, dënohet me 2 (dy) ndeshje pezullim nga veprimtaritë.

Lojtari i KF Valbona, Edmir Vidrica,për sjellje të dhunshme ndaj lojtarëve kundërshtar, në bazë të nenit 14/1/h të KDE dënohet me 4 (katër) ndeshje pezullim nga aktiviteti.

Lojtari KF Burreli, Aleks Dedgjonaj, për sjellje josportive ndaj zyrtarëve të ndeshjes, në bazë të nenit 14/1/j të KDE, dënohet me 4 (katër) ndeshje pezullim nga veprimtaritë.

KF Bylis U-19, për aktivizimin e një lojtari që nuk kishte të drejtë të luante në ndeshjen e vlefshme të Abissnet Superiore U-19, kundër KF Skënderbeu U-19, në bazë të neneve 19/2 dhe 19/4/a të KDE, humbet ndeshjen në tavolinë me rezultatin 3-0.

Kundër vendimit lejohet ankim brenda 3 (tre) ditëve përpara Komisionit të Apelit.