Rreth 23 milionë njerëz po përballen me pasiguri akute ushqimore dhe vendi është afër kolapsit ekonomik
Kombet e Bashkuara i kanë bërë thirrje komunitetit ndërkombëtar për të dhënë një fond prej 4.4 miliardë Dollarë për Afganistanin teksa rriten gjithnjë e më shumë shqetësimet për sundimin e talebanëve.
Gjashtë në çdo 10 afganë kanë nevojë për ndihmë, pjesa më e madhe e saj ushqim, në mes të një krize ekonomike të përkeqësuar nga një ndërprerje e ndihmës financiare pas pushtimit të talebanëve në gusht.
“Afganët kanë nevojë për ndihmën tonë për të mundësuar ekonominë e tyre, për të mbështetur bujqësinë e tyre dhe për të mundësuar funksionimin bazë të shërbimeve sociale“, tha shefi i ndihmës i OKB-së, Martin Griffiths në një konferencë shtypi.
OKB ka bërë të ditur se fondet janë trefishi i shumës së kërkuar në vitin 2021. Javën e kaluar, talebanët u tërhoqën pas një njoftimi se shkollat e mesme do të hapeshin për vajzat, duke thënë se ato do të qëndronin të mbyllura derisa të hartohej një plan në përputhje me ligjin islamik për rihapjen e tyre.
Griffiths kërkoi angazhim politik me administratën islamike, duke thënë se ajo dëshiron të gjejë “një rrugë konstruktive përpara” me komunitetin global dhe se izolimi i Afganistanit tani do të sillte më shumë vuajtje në të ardhmen.
Rreth 23 milionë njerëz përballen me pasiguri akute ushqimore pasi Afganistani po përjeton gjithashtu thatësirën më të keqe në 30 vitet e fundit, ndërsa 10 milionë fëmijë kanë nevojë urgjente për ndihmë.
Zyrtari i Ministrisë së Jashtme gjermane Ricklef Beutin bëri thirrje që bota të bashkohet për të ndihmuar Afganistanin dhe se talebanët, autoritetet de facto duhet të përmbushin përgjegjësitë e tyre, të mbrojnë njerëzit.
Klan News
