Lajme Arkiva 2004

Sipas Partisë Demokratike OSBE duhet të ndërhyjë për të riparë projektligjin për pronat para se të kalojnë në Kuvend. Sipas nënkryetarit demokrat Bamir Topi, socialistët nuk kanë respektuar konsensusin si u ra dakord në takimin me presidentin. Topi shprehet se çështja e kthimit  dhe kompensimit të pronave nuk ka miratimi e të gjitha forcave politike.

Bamir Topi: “Minimalisht OSBE-ja duhet të dalë në një deklaratë. Natyrisht është puna e tyre dhe ata e dinë se si të reagojnë, por për të thënë se ky nuk mund të jetë më një ligj ashtu sikurse është propaganduar nga qeveria një ligj konsensual, sepse ky ligj nuk e ka më konsensusin e forcave politike. Praktikisht ky është një ligj në variantin e qeverisë”.

Me gjithë asistencën e dhënë nga OSBE për këtë projektligj opozita shprehet e shqetësuar se abuzimi më i madh me pronën ka ardhur nga qeveria dhe pushteti vendor  pasi njerëz me pushtet kanë zënë toka bregdetare dhe prona të shtetit duke deformuar  pronësinë në hipoteka.

Bamir Topi: “Kryeministri shqiptar së bashku me ekzekutivin që ai drejton, së bashku me bordet apo me komisionet e kthimit dhe të kompensimit të pronave ka, shfrytëzuar pushteti në  mënyrë tepër abuzive për të marrë tokat preferenciale që kanë qenë ose të shtetit ose prona të cilat  janë deformuar nëpër hipotekat e  vendit”.

Demokratët kërkojnë që territoret e lira tu kthehen pronarëve qoftë edhe në zona turistike duke ju nënshtruar planit urbanistik. Sipas opozitës kompensimi financiar i pronarëve nuk duhet bërë  me vlerat e tregut 1945./tvklan.al