Në 6-mujorin e parë të 2024-shit, individët dhe bizneset kanë kryer rreth 22.5 milionë pagesa në rrugë bankare duke shënuar rritje me 20.3%, krahasuar me të njëjtën periudhë të 2023.

Sipas shifrave zyrtare nga Banka e Shqipërisë, vlera totale e transaksioneve në periudhën Janar-Qershor të këtij viti shënoi një rritje me 7% krahasuar me 6-mujorin e parë të 2023.

Peshën kryesore në veprimet bankare të shqiptarëve vazhdojnë ta zënë pagesat me karta, me rreth 64% të totalit, ku kryesisht këto veprime dominohen nga tërheqjet e parasë cash nga bankomatet.

Gjithsesi, gjatë këtij 6-mujori rritje kanë pësuar edhe pagesat me kartë në terminalet POS. Në periudhën Janar-Qershor u regjistruan gjithsej rreth 8.85 milionë pagesa me kartë në terminalet elektronike të shitjes, duke shënuar rritje me 36%.

Në mesin e këtij viti, numri i kartave bankare aktive arriti në 1.48 milionë, një rritje me pothuajse 6% krahasuar me 2023-shin, nënvizon Banka e Shqipërisë.

Gjithashtu, pjesë e rëndësishme brenda pagesave në rrugë bankare janë edhe transfertat e kreditimit të nisura nga klientët në distance që njihet ndryshe si internet banking. Sipas Bankës së Shqipërisë, veprimet në kanalet elektronike zënë rreth 59% te numrit total të këtyre transfertave.

Tv Klan