Pasagjerët e fluturimit të Southwest Airlines që ishte nisur drejt Houston në SHBA, u tmerruan kur panë këtë diel sesi motori i Boeing 737-800 nisi të shpërbëhej gjatë fluturimit.

Avioni u desh të kthehej menjëherë në Denver, pasi anëtarët e ekuipazhit dalluan që pjesa metalike e cila mbulon një prej motorëve u shkul gjatë ngritjes.

Në një video të postuar në X, shihet qartë që copa metalike lëviz si të jetë prej letre e rrezikon që të shkëputet tërësisht nga motori. Një zëdhënës i kompanisë tha se incidenti kishte ardhur si pasojë e ‘çështje mekanike’.

Sipas mediave amerikane avioni u rikthye në Aeroportin Ndërkombëtar të Denverit 25 minuta pasi ishte ngritur në ajër. Gjatë uljes nuk pati probleme, ndërsa pasagjerët u detyruan që udhëtimin e tyre ta vijonin me një tjetër avion.

Autoritetet e Aviacionit Civil amerikan thanë se kanë nisur hetimet për ngjarjen. Ky incident në fakt është i disati që prek gjigandin e aviacionit, Boeing, gjatë 2024 dhe vjen rreth 2 javë pas CEO Dave Calhoun njoftoi largimin na ky post në fund të vitit./tvklan.al