Riviera shqiptare vazhdon të zë vend në shkrimet e mediave të huaja. Këtë herë në lupën e së përditshmes britanike “Daily Express” është Himara, një qytet i vogël në bregdetin jugor të vendit me një sërë plazhesh spektakolare siç shkruhet në artikull.

Ajo që vlerësohet është fakti se Himara ka kaq shumë hapësira ​​të paprekura për t’u zbuluar.

Një ndër plazhet që kjo media rekomandon për pushuesit është Plazhi Spile, plazhi kryesor në Himarë, pranë qendrës së qytetit lehtësisht i aksesueshëm me disa nga restorantet më të mira të zonës.

Vizitorët aty janë shprehur entuziastë për shërbimin dhe ushqimin e freskët. Nuk mund të mungojë si sugjerim edhe Gjiri i Akuariumit që cilësohet si “plazhi më i bukur në Himarë”. Blogerët e udhëtimit e kanë përshkruar plazhin e Akuariumit si një copëz e parajsës shqiptare, me rërën e bardhë dhe shkëmbinjtë që krijojnë një liman të vogël.

Qyteti i vjetër i Himarës me shtëpi tradicionale prej guri është një tjetër vend që ia vlen të eksplorohet sipas Daily Express, i vendosur në majë të një kodre shkëmbore me një pamje të mrekullueshme të maleve dhe detit Jon.

Tv Klan