Lajme Arkiva – TV Klan 2003

Është kurorëzuar dje në ambientet e Shtëpisë së Librit dhe Komunikimit, fituesi i çmimit Hieronimus, dedikuar përkthimeve në fushën e mendimit në gjuhën shqipe.

Në edicionin e 2-të të këtij konkursi, juria e përbërë nga Besnik Mustafaj, Fatos Kongoli, Kristina Jorgji, Xhevat Lloshi dhe me kryetar Edmond Tupjen, vendosi që çmimin e parë t’ia jap përkthyesit Zef Simoni për përkthimin e veprës “Fjalori i politikës”. Në konkursin për përkthimin më të mirë nga fusha e mendimit, këtë vit janë paraqitur sipas organizatorëve 15 tituj, të gjithë të përkthyer nga gjuhë dhe autorë të ndryshëm.

Pretendentë për çmimin Hieronimus, në këtë edicion të 2-të të tij, ishin edhe autori Afrim Koçi me përkthimin e librit “Kujtimet e Ekrem Bej Vlorës”, Anila Omari me përkthimin e librit “Homo Aestheticus” të autorit Luc Ferry, Ardian Klosi me përkthimin e librit “Plugu shpata dhe libri”, si dhe mjaft të tjerë.

Ky konkurs nga viti në vit po kthehet në një nga aktivitetet më të rëndësishme në fushën e përkthimeve, të cilat sjellin vlera të vërteta në kulturën shqiptare dhe sfidojnë kështu përkthimet pa kriter dhe pa vlera, që qarkullojnë sot në tregun e librit në Shqipëri./tvklan.al

Gazetare – Fjodora Fjora