Opozita ka vendosur që të bojkotojë të gjitha komisionet parlamentare të cilat janë planifikuar për tu mbajtur ditën e sotme.

Gazetari i Klan News, Enkel Xhangoli bën më dije se edhe pse u paralajmërua që mund të kishte aksione, duket se skenari i ardhshëm do të jetë bojkoti i komisioneve parlamentare dhe bllokim të seancave parlamentare. Në komisionet parlamentare aktualisht po marrin pjesë vetëm deputetët socialist.

Ndërkohë opozita nisi paraditen e së hënës bojkotin e pjesshëm të komisioneve parlamentare, si pjesë e aksionit të saj të mosbindjes civile, për shkak të burgosjes së deputetit Ervin Salianji. Gjatë ditës së djeshme vetëm Jorida Tabaku dhe Edi Paloka morën pjesë në mbledhjen e Komisionit për Çështjet Evropiane, ku është diskutuar për draft-pozicionin negociues për grupimin e parë të kapitujve “Themelorët”, për negociatat për anëtarësimin në BE. 

Seanca plenare e ditës së djeshme u shoqërua me kaos ku u hodhën sende në drejtim të kryetares së Kuvendit. Mes të tjerash deputetët e Partisë Demokratike pasi bllokuan foltoren, u larguan nga aty ku ata morën karriget dhe i hodhën jashtë ambienteve të Kuvendit ku iu vendosën flakën. Kuvendi ndërkohë pritet të marrë masë disiplinore për 24 deputetë demokrat.

Kujtojmë se opozita ka lajmëruar një protestë mbarë kombëtare më 7 Tetor në orën 18:00 që do të nisë para Kryeministrisë dhe do të shpërndahet në të gjitha rrugët./tvklan.al