Me rritjen e kërkesës për shërbime turistike, administratorët e hotelerive në Durrës kanë filluar të ofrojnë paga më të larta për të tërhequr punonjës cilësorë.
Rritje e pagave ka sjellë një fenomen të ri në tregun e punës sidomos ne bregdet, tërheqjen e punonjësve nga jashtë vendit.
Shumë shtetas shqiptar të cilët kanë emigruar drejt vendeve të bashkimit Evropian, po rikthehen për t’u bërë pjesë e tregut vendas të punës.
Arsen Çollaku, është njëri prej tyre, i cili ka lënë Gjermaninë për të punuar si kuzhinier në një nga hotelet e Durrësit. Operatorët turistik thonë se ky fenomen po ndihmon në përballimin e sfidave të sezonit turistik, kur kërkesa për staf shtohet ndjeshëm.
Me ardhjen e punonjësve nga jashtë, operatorët turistikë mund te rrisin cilësinë e shërbimeve dhe të ofrojnë një standard të lartë, që është thelbësore për të tërhequr dhe mbajtur turistët e shumtë që zgjedhin Durrësin për pushime.
Operatorët turistikë u bëjnë thirrje shtetasve shqiptar që punojnë në shtete të ndryshme, të hedhin sytë nga Shqipëria.
Rritja e pagave nga operatorët turistikë dhe thithja e punonjësve nga jashtë vendit është një strategji që po ndihmon në përmirësimin e sektorit të turizmit në Shqipëri, duke e bërë atë më konkurrues dhe më tërheqës për vizitorët ndërkombëtarë.
Klan News